Petropavlda alaıaqtyq jasaǵan patrýldik polıtsııa ınspektory sottaldy
PETROPAVL. QazAqparat – Petropavl qalalyq soty kólik júrgizýshisin aldap, onyń 50 myń teńge aqshasyn ıemdenbek bolǵan patrýldik polıtsııa batalonynyń ınspektoryn sottady, dep habarlaıdy QazAqparat tilshisi.
Qylmystyq iske qatysty sot otyrysy búgin ótti. Petropavl qalalyq sotynyń málimetinshe, 2021 jylǵy 3 qazanda patrýldik polıtsııa batalonynyń ınspektory S. jol qozǵalysy erejelerin buzdy degen syltaýmen kólik júrgizýshisin aldap, odan 50 myń teńgesin almaq bolǵan. Polıtseı aqshany alǵannan keıin ustaldy.
Inspektordyń kinási jábirlenýshiniń aıǵaqtarymen, jazbasha dáleldermen dáleldendi.
«Sot úkimimen S. alaıaqtyqqa oqtalǵany úshin kináli dep tanyldy, óıtkeni alǵan aqshasyn paıdalanyp úlgermegen. Sot S.-nyń jasaǵan isine shyn júrekten ókinýin, onyń asyraýynda eki jas balanyń bolýyn jazany jeńildetetin mán-jaı dep sheshti. Ózi qabyldaǵan antty buzýyn qylmystyq quqyq buzýshylyq jasaýdy aýyrlatatyn mán-jaı dep tanydy. Qylmystyń bul túrine aıyppul nemese bas bostandyǵynan aıyrý jazasy qarastyrylǵan. Al qylmysqa oqtalǵany úshin jazanyń merzimi nemese mólsheri aıaqtalǵan qylmys úshin jazanyń ¾ - den aspaýy tıis», - delingen habarlamada.
Sot úkimimen S.-ǵa urlanǵan múliktiń 15 eselengen mólsherinde - 750 myń teńge kóleminde aıyppul salyndy. Sondaı-aq, S. ómir boıy memlekettik qyzmette eńbek etý quqyǵynan, sondaı-aq polıtsııa aǵa leıtenanty arnaýly ataǵynan aıyryldy.
