Petropavlda alaıaqtarǵa kýrer bolǵan 20 jastaǵy jigit 3 jylǵa sottaldy
ASTANA. KAZINFORM — Petropavlda alaıaqtyq shemaǵa qatysqan 20 jastaǵy elordalyq turǵyn úsh jylǵa bas bostandyǵynan aıyryldy.
Tergeý materıaldaryna sáıkes, jas jigit Telegram jelisinen «jeńil jumys» týraly habarlandyrý kórip, alaıaqtardyń usynysyna kelisken. Osy maqsatta ol arnaıy Petropavlǵa barǵan.
Alaıaqtar egde jastaǵy turǵyndarǵa quqyq qorǵaý organdarynyń qyzmetkerleri retinde qońyraý shalyp, olardyń jaqyndary jol-kólik oqıǵasyna kináli bolǵanyn aıtqan. Qylmystyq jaýapkershilikten qutqarý úshin aqsha qajet dep sendirgen.
Osylaısha Petropavldyń úsh turǵyny alaıaqtarǵa 1-den 3 mıllıon teńgege deıin aqsha bergen. Qolma-qol qarajatty taksı júrgizýshileri kúmándi «sálemdeme» retinde jetkizgen. Olar júktiń qylmystyq shemaǵa qatysy baryn bilmegen.
Al aqshany qabyldap, keıin ony belgilengen jerge aparý mindetin 20 jastaǵy jigit atqarǵan. Ótken jyldyń 8 jáne 9 qyrkúıeginde ol úsh «sálemdemeni» qabyldap, olardy butalardyń arasyna jáne qoqys jáshikterine jasyrǵan.
Polıtsııaǵa alǵashqy aryzdar túskennen keıin jedel ýákilder kúdiktiniń jeke basyn anyqtap, ony ustady. Tergeý barysynda onyń qylmysqa qatysy dáleldendi.
Sot jas jigitti kináli dep tanyp, 3 jylǵa bas bostandyǵynan aıyrdy. Sonymen qatar oǵan keltirilgen zalaldy ishinara óteý mindeti júkteldi. Sot úkimi zańdy kúshine endi.
Polıtsııa azamattardy áleýmettik jeliler men messendjerlerdegi «jeńil jumys» týraly kúmándi usynystarǵa saq bolýǵa shaqyrdy. Zańsyz jolmen tabys tabýǵa umtylý qylmystyq jaýapkershilikke ákelýi múmkin.
Eske salaıyq, Astanada esirtki taratýmen aınalysqan uıymdasqan toptyń músheleri sottalǵanyn habarlaǵanbyz.
