Petropavlda Alaý estafetasyna daıyndyq aıasynda synaq jattyǵýy ótti
PETROPAVL. 14 qańtar. QazAqparat /Sergeı Kýznetsov/ - VII qysqy Azııalyq oıyndardyń ashylýyna 16 kún qaldy. Azıadanyń Alaý estafetasy da bastalyp ketti,
estafeta Soltústik Qazaqstan oblysynyń aýmaǵymen 20-21 qańtar kúnderi ótedi. Osynaý shara kezinde qandaı da tehnıkalyq kemshilikterge jol berilmes úshin, búgin Petropavlda Alaý estafetasynyń synaq jattyǵýy ótkizilip, sharaǵa jumyldyrylǵan barlyq qyzmetterdiń daıyndyqtary tekserildi.
Alaýgerlerge nusqaýlar berildi. Olardyń qatarynda bokstan sport sheberi, Álem kýbogynyń kúmis júldegeri, KSRO Spartakıadasynyń chempıony Kamıl Safın, eki Olımpıada oıyndarynyń qatysýshysy, Azııa chempıony, Qazaqstannyń 17 dúrkin chempıony, jeńil atlet Elena Parfenova, halyqaralyq sanattaǵy sport sheberi, kıkbokstan álem chempıony Samat Qadyrbekov, QR eńbek sińirgen sport sheberi, kir tasyn kóterýden álem chempıony Vıtalıı Dıdenko syndy tanymal soltústikqazaqstandyq sportshylar bar.
Petropavlda Alaý estafetasy 21 qańtar kúni Abylaı han rezıdentsııasynan bastalyp, N.Pogodın atyndaǵy oblystyq orys teatrynyń aldyndaǵy alańda sórege jetedi.
