Petropavlda alpınıstik quraldardyń kómegimen 4-shi qabattan sekirmek bolǵan adam qutqaryldy

PETROPAVL. QazAqparat – Petropavlda 4-qabattaǵy páterdiń terezesinen sekirmek bolǵan er adamdy qutqarý úshin arnaıy operatsııa uıymdastyrýǵa týra keldi. Nátıjesinde qutqarýshylar alpınıstik jabdyqty qoldanyp, qala turǵynyn aman alyp qaldy, dep habarlaıdy QazAqparat tilshisi.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, oqys oqıǵa 2 naýryz kúni keshqurym boldy. Vedomstvonyń jedel kezekshisine habarlasqandar Petropavldaǵy Bereke yqshamaýdanyndaǵy kóp qabatty úılerdiń biriniń 4-shi qabatynan er adamnyń sekirmek nıette ekendigin aıtqan.

Jedel-qutqarý otrıady kelgende jigit 4-qabattaǵy páterdiń tereze jaqtaýynda otyrǵan. Qutqarýshylar, polıtseıler jáne turǵyndar qutqarý kenebin jaıyp, astynda turdy.

«Ol jat qylyq kórsetti, betimen sóılep, terezeden sekiremin dep qorqytty. Birese jaqtaýǵa mindi, qaıta tústi. Tómengi páterde jáne jerde turǵan polıtseılerdiń sózine qulaq aspady. Sondyqtan jyldam qımyldaý qajettigin túsindim. Alpınıstik jabdyqty alyp, besinshi qabatqa kóterildik. Páter ıeleri túsinistik tanytyp, bizdi kirgizdi.

Foto: SQO TJD baspasóz qyzmeti

Meniń aldymda besinshi qabattyń terezesinen tórtinshi qabatqa túsip, yńǵaıly sátte terezedegi jigitti jyldam ishke ıterip kirgizý mindeti turdy. Oıym júzege asyp, ishke qulaǵan jigitti polıtseıler ustap qaldy», - deıdi qutqarýshy Aıbol Otarbaev.

Aıbol Otarbaev jedel-qutqarý otrıadynda 8 jyldan beri jumys isteıdi. Osy aralyqta ol kóptegen qutqarý operatsııasyna qatysty. Kóktemgi sý tasqynynda turǵyndardy qaýipsiz jerge shyǵardy, jol-kólik apaty kezinde qysylyp qalǵan adamdardy, alpınıstik jabdyqty qoldanyp, úıde jalǵyz qalyp qoıǵan balalardy qutqardy.

«Kúndelikti jattyǵýlar arqyly tájirıbemizdi ushtap otyramyz. Jalpy qutqarý – komandalyq jumys, munda toptaǵy ár mamannyń eńbegi ólsheýsiz», - deıdi Aıbol Otarbaev.