Petropavlda aqsaqaldar bata aıtýdan saıysqa tústi
PETROPAVL. KAZINFORM – Petropavlda aqsaqaldar arasynda bata berýden «Aq bata» oblystyq saıysy ótti.
Іs-sharaǵa Petropavldan, aýdandardan aqsaqaldar qatysty. Saıys eki kezeńnen turdy. Qatysýshylar salt-dástúr jaıynda bilimderin kórsetip, suraqtarǵa jaýap berdi. Ekinshi kezeńde aqsaqaldarǵa ártúrli jaǵdaılarda aıtylatyn batalardyń taqyryptary berildi. Olar sol boıynsha bata berdi.
— Din men dástúr egiz uǵym. Sondaı-aq qazaqta «batamenen jer kógerer» degen naqyl sózi bar. Osy elimizdiń bir berekesin arttyrý maqsatynda jáne aqsaqaldarymyzdyń mártebesin kóterý maqsatynda osy is-sharany uıymdastyrdyq. Zamanǵa qaraı adamy. Biraq aqsaqal bolǵannan keıin, 60-70-ten asqannan keıin dastarhanda otyryp bata bere alatyndaı jaǵdaıda bolý kerek. Bata berý úshin de adamnyń júrip ótken joly bolýy qajet. Ózindik aıtar sózi bolǵany jón. «Jas kezińde baıqaryń bolmasa, qartaıǵanda aıtaryń bolmaıdy» degen bar, - deıdi oblystyń bas ımamy Hamzat Ádilbekov.
Beskól aýylynan kelgen Japar Bárıulynyń jasy 70-ke taıaǵan. Aıtýynsha, saıys týraly on shaqty kún buryn habarlanǵan. Biraq jas ulǵaıǵanda jańa bata jattaý ońaıǵa soqpapty.
— Maǵan «jyrtys» degen ne degen suraq keldi. Sondaı-aq alǵys aıtý batasyn beremin. Bilgenimshe jaýap berdim. Máselen «jyrtystyń» eki túri bolady. Toıdan kelgen jyrtys jáne jasy jetip, 80-90-ǵa kelip qaıtqan adamnyń jasyn bersin dep yrymdap beretin jyrtys bar. Toı jyrtysy degen, kelin kelgende qudalar jaǵy dorba ákeledi. Sol dorbanyń ishinde syı retinde mata bolady. Sony jyrtyp, toıshy qaýymǵa taratady, - deıdi aqsaqal.
Saıys barysynda qatysýshylar bata berý ónerimen qatar, dinı bilimderi men salt-dástúrge jetiktigin kórsetti. Qazylar alqasy aqsaqaldardyń bata berý sheberligin, til baılyǵy men sheshendigin baǵalaı otyryp, úzdikterdi anyqtady. Nátıjesinde «Qyzyljar» qalalyq meshitiniń atynan kelgen Tálı Kárıev birinshi oryndy jeńip aldy. Jeńimpazdar baǵaly syılyqtarmen marapattalady jáne respýblıkalyq baıqaýǵa joldama aldy.
Buǵan deıin Petropavlda jilikti qolmen syndyrýdan jarys ótkenin jazǵan edik.