Petropavlda ákimdik árqaısysy 170 mln teńge bolatyn eki kottedj satyp aldy
PETROPAVL. KAZINFORM — Petropavlda qalalyq ákimdik sharshy metrin 750 myń teńgeden alǵan eki baspanany buzyp, bolashaqta ornyna balabaqsha salmaq.
Tender arqyly alynǵan kottedjderdiń árqaısysynyń aýdany 227 sharshy metr shamasynda. Sondaı-aq shartta úıdiń aýdanynan bólek, 1998 jylǵa deıin salynǵandyǵy jáne qalanyń shetkeri aýdandarynan bolmaýy kórsetildi.
Petropavl qalalyq ákimdiginiń turǵyn úı-kommýnaldyq sharýashylyǵy bólimi osyǵan qatysty jaýap berdi.
— Ár úıdiń táýelsiz baǵalaýshylar 170 mln teńgege baǵalady. Bul úıler qala qurylysy josparyna sáıkes, áleýmettik ınfraqurylymdy damytý úshin alynyp otyr. Qazir Petropavlda 49 balabaqsha jumys isteıdi. Al osy satyp alynǵan ǵımarattardyń ornyna bolashaqta jańa balabaqsha salý josparlanǵan. Eń bastysy — jańa balabaqsha turǵyn úılerge jaqyn ornalasady, — dedi ákimdik ókilderi.
Alaıda turǵyndar bolashaqta buzylatyn eki úıge 340 mln teńge jumsaý bıýdjet qarajatyn tıimsiz paıdalaný dep esepteıdi. Olardyń aıtýynsha, sharshy metri 750 myń teńge degen baǵa, tipti Astanada joq.
Buǵan deıin Soltústik Qazaqstan oblysynda 112,4 mlrd teńge bıýdjet qarjysy tıimsiz josparlanǵanyn jazǵan edik. Joǵary aýdıtorlyq palata óńirge bólingen bıýdjet qarajaty men memlekettik aktıvterdiń paıdalanylý tıimdiligine júrgizilgen aýdıttiń qorytyndysyn jarııalady.