Petropavlda ákimderge arnalǵan bes kúndik semınar bastaldy
PETROPAVL. QazAqparat - Petropavlda «Aýmaqtyq damýdyń transformatsııasy» atty semınar bastaldy. Atalmysh sharaǵa qala jáne 13 aýdannyń ákimi qatysty, dep habarlaıdy QazAqparat tilshisi.
Ákimderdi QR Aýyl sharýashylyǵy mınıstriniń birinshi orynbasary, jobalyq menedjment boıynsha sertıfıkattalǵan jattyqtyrýshy Arman Evnıev jáne QR Prezıdenti janyndaǵy Memlekettik basqarý akademııasynyń ókilderi oqytady.
Mamandardyń aıtýynsha, semınardyń maqsaty - kásibı biliktilikti arttyrý jáne jańasha oılaý daǵdylaryn qalyptastyrý. Jıyndy oblys ákiminiń orynbasary Madııar Qojahmet ashty.
«Aýmaqtardy damytýda halyqtyń ál-aýqatyn jaqsartý jáne olardyń ómir sapasyn arttyrý mańyzdy aspektilerdiń biri. 2025 jylǵa deıingi strategııalyq damý josparynyń «Qýatty aımaqtar jáne ýrbanızatsııa» reformasy - bul ár aımaqtyń ekonomıkalyq turǵyda ózdiginen damýyna baǵyttalǵan. Sondyqtan bul semınardyń qatysýshylarǵa bereri mol dep oılaımyn», - deıdi Madııar Qojahmet.
Arman Evnıev qala jáne aýdan ákimderine aýyl sharýshylyǵy ónimderi men eksport kólemin ulǵaıtý, memlekettik jobalardy tıimdi júzege asyrý syndy taqyryptarda dáris oqyp, óz tájirıbesimen bólisedi.
«Eń aldymen maqsatty aıqyndaý qajet. Tájirıbe kórsetip otyrǵandaı kóptegen memlekettik qyzmetkerler men kásipkerlerde naqty alǵa qoıǵan maqsat joq. Maqsat ózekti, shyndyqqa negizdelgen, qoljetimdi jáne ólshemdi bolýy kerek. Ekinshiden, ár jaýapkershilikti derbesteý qajet, ıaǵnı ár kórsetkishke naqty adam jaýap beredi. Al úshinshisi - jumys algorıtmi», - deıdi QR Aýyl sharýashylyǵy mınıstriniń birinshi orynbasary, jobalyq menedjment boıynsha sertıfıkattalǵan jattyqtyrýshy Arman Evnıev.
Onyń aıtýynsha, uzaq merzimdi 10 baǵdarlama jasalǵan. Onyń tórteýi ósimdik, taǵy osynshasy mal sharýashylyǵy jáne janýarlar álemi, orman sharýashylyǵy men akvamádenıetti qamtıdy. Bul jobalardyń barlyǵy bir baǵdarlamaǵa biriktirilgen. Semınarda osy baǵdarlamalardy basqarý tetikteri qarastyrylady.
«Aýmaqtyq damýdyń transformatsııasy» semınary bes kúnge shaqtalǵan. Ol naýryzdyń 11-i men 15-i aralyǵynda Petropavl qalasynda ótedi.
