Petropavlda aktsııa boıynsha polıtsııaǵa tirkeýde bolmaǵan alǵashqy qarý tapsyryldy
PETROPAVL. QazAqparat - Petropavlda Polıtsııa basqarmasyna respýblıkalyq aktsııa aıasynda alǵashqy qarý tapsyryldy, dep habarlaıdy QazAqparat tilshisi.
Tirkelmegen qarýdy óz erkimen tapsyrý aktsııasy elimizde 10 sáýirde bastalǵan edi.
Soltústik Qazaqstan oblysy PD baspasóz qyzmetiniń habarlaýynsha, aktsııanyń birinshi kúni oblys ortalyǵynyń ákimshilik polıtsııasyna 12 kalıbrli IJ-54 tegis uńǵyly ańshy myltyǵyn 61 jastaǵy qala turǵyny tapsyrdy. Onyń aıtýynsha, qarýdy taýyp alǵan. Qarýdyń qylmysqa qatysty bar-joqtyǵy tekserilgennen keıin qala turǵynyna, eger birinshi sanat boıynsha baǵalansa - 75 myń teńge, ekinshi sanat boıynsha 53 myń teńge tólenedi.
«Barlyq tapsyrylǵan qarý krımınaldyq esepter boıynsha tekserilgennen keıin arnaıy komıssııa úsh sanat boıynsha baǵalaıdy. Birinshi sanatqa - jańa qarý, ekinshi sanatqa - paıdalanylǵan, úshinishi sanatqa - isten shyqqan qarý jatady. Byltyr soltústikqazaqstandyqtar aqyly negizde 151 qarýdy tapsyrdy. Olarǵa 8 mln astam teńge tólendi», - deıdi oblystyq PD Ákimshilik polıtsııa basqarmasynyń bastyǵy Jasulan Ospanov.
Bıyl Soltústik Qazaqstan oblysynda osy aktsııany ótkizýge 6 mln teńge bólindi. Zańsyz saqtalǵan qarýdy tapsyrýǵa nıet bildirgender aýmaqtyq polıtsııa bólinisterine júginýi kerek. Syıaqy alý úshin jeke kýáliktiń kóshirmesin, banktegi esep-shottyń 20 tańbaly nómiri (áleýmettik tólemderge arnalǵan shottardan basqa) jáne qarýdy baǵalaıtyn komıssııa qorytyndysyn usyný qajet.
Sondaı-aq, polıtseıler aktsııa boıynsha zańsyz saqtalǵan qarýdy óz erkimen tapsyrǵan azamattar jaýapkershilikten bosatylatynyn eskertedi.
