Petropavlda aqaý joıylyp, 90-nan astam úı jylýǵa qosyldy
«Petropavl jylý jelileri» JShS mamandary barlyq ýchaskedegi qubyrlarǵa kúndelikti tekseris júrgizip otyr. Osyndaı tekseristerdiń birinde 314 atqyshtar dıvızııasy, Partızan jáne Maıakovskıı kósheleriniń boıyndaǵy № 28 jylý magıstralinde aqaýdyń barlyǵy anyqtaldy. 1984 jyly paıdalanýǵa berilgen dıametri 400 mm qubyr eskirgen.
Qubyrdy jóndeý úshin 7 jeltoqsan kúni tańǵy saǵat 9.00-de 90-nan astam turǵyn úı jylýdan ajyratyldy. Petropavl ákimi Rýslan Ańbaev jumys barysyn nazarda ustap, áleýmettik jelide habardar etip otyrdy.
«Aqaýdyń qaı jerde paıda bolǵany anyqtalǵannan keıin, úılerdegi jylý mólsheri azaıady. Barlyq jumystardy búgin aıaqtaý josparlanyp otyr.
Jumysqa 10 adamnan qurylǵan 2 brıgada men 6 arnaıy tehnıka jumyldyrylǵan», - dep bastady alǵashqy jazbasyn qala ákimi.
Sondaı-aq turǵyndardyń yńǵaılyǵy úshin 152 nómiri boıynsha dıspecherlik qyzmet pen 109 nómiri boıynsha sıtýatsııalyq ortalyq jumys isteıtinin eske saldy.
Saǵat 23.00-de magıstraldaǵy jumys tolyq aıaqtalyp, turǵyn úılerge jylý berildi.
«7 jeltoqsanda «Petropavl jylý jelileri» JShS mamandarymen tehnologııalyq aqaý tolyq joıyldy. 11 metr qubyr aýystyryldy. Barlyq kópqabatty úıler men jer úı sektory jylýmen tolyq qamtamasyz etildi», - dedi Rýslan Ańbaev.
SQO-da eki aptadan artyq aıaz. Kúndiz aýa temperatýrasy 18-20 gradýsty kórsetse, túnde synap baǵanasy -23 gradýsqa deıin tómendeıdi.
Buǵan deıin oqýshylar tońyp otyrǵan aýyl mektebiniń úsh aýysymǵa aýystyrylǵanyn jazǵan edik.
Sondaı-aq Petropavldaǵy M.Jumabaev atyndaǵy ІT mektep-lıtseıdiń kabınetteri jylý úrlegish quraldarmen jylytylyp otyrǵanyn da habarladyq.