Petropavlda aǵylshyn tili tegin oqytylady
PETROPAVL. QazAqparat - Petropavlda aǵylshyn tili kýrsyna tyńdaýshylar qabyldanyp jatyr. Til meńgerýdi maqsat etken qala turǵyndary aqpan aıynan bastap bilimderin tegin jetildire alady, dep habarlaıdy QazAqparat tilshisi.
Aǵylshyn tili kýrsyn SQO ákimdiginiń tilderdi damytý basqarmasynyń «Tilderdi oqytý ortalyǵy» KMM uıymdastyryp otyr. Mundaı kýrs byltyr da jumys istegen. 20 shaqty adam jazylyp, sonyń segizi ǵana sońyna deıin oqyǵan. Mamandardyń aıtýynsha, oǵan sebep - kýrstyń tym uzaqqa, 8 aıǵa sozylýy.
«Bıylǵy ereksheligi - oqý kýrsynyń qysqalyǵynda. Tyńdaýshylar 2,5 aı oqıdy, ıaǵnı 40 saǵatta aǵylshyn tilin qarapaıym deńgeıde bilip shyǵady. Máskeý ýnıversıtetiniń professory D.Petrovtyń ádisin qoldanamyz. Ol otyzdan artyq shet tilin biledi. Ǵalymnyń aıtýynsha, kez kelgen tildi 16 saǵatta meńgerip shyǵýǵa»,- deıdi «Tilderdi oqytý ortalyǵy» KMM dırektorynyń orynbasary Oral Janatov.
Aǵylshyn tili kýrsy jasy 18-den asqan eresekterge arnalǵan. Kóbi jumysbasty bolǵandyqtan, oqý aptasyna eki ret sársenbi jáne juma kúnderi keshki saǵat 18.30-da bastalady. Sabaq 80 mınýtqa shaqtalǵan. Ázirshe tek 10 adam ǵana oqýǵa tilek bildirip, jazylypty. Ortalyq jalpy jıyrma adamǵa deıin qabyldaýǵa qaýqarly. Al sáýir aıynyń ortasynan bastap kelesi topty qabyldap, bazalyq bilim bermek.
Tilderdi oqytý ortalyǵynda qazaq tilin de tegin meńgerýge bolady. Mamandardyń aıtýynsha, byltyr petropavldyqtar tarapynan aǵylshyn tilin úırenýge suranys joǵary bolsa, bıyl kerisinshe. Qazirdiń ózinde 25 adam qazaq tili kýrsyna jazylyp qoıypty.
