Petropavlda aǵash materıaldaryn satatyn kásiporynda órt shyqty
PETROPAVL. KAZINFORM – Petropavldaǵy aǵash materıaldaryn satatyn kásiporynda bolǵan órtten garaj jáne eki júk kóligi janyp ketti.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, órt J.Qızatov kóshesindegi aǵash materıaldaryn satatyn kásiporyn aýmaǵynda shyqqan. Habar túsisimen jetken órt sóndirýshiler kelgende nysan aýmaǵyndaǵy garaj lapyldap janyp jatqan. Nysannyń ishinde satýǵa daıyn turǵan qurylys materıaldary artylǵan eki júk kóligi turǵan.
— Órt qaýpiniń ekinshi deńgeıi jarııalandy. Daıyn qurylys materıaldary úıilip jatqandyqtan órt shyqqan orynǵa jetýdi qıyndatty. Ári materıaldardyń joǵary janǵyshtyǵymen de kúrdelendi, bul ottyń tez taralý qaýpin týdyrdy. Jalynmen kúreske 9 tehnıka, jeke quramnan 22 adam jumyldyryldy, — deıdi SQO TJD ekinshi mamandandyrylǵan órt sóndirý bólimi bastyǵynyń orynbasary Nurhan Tuıaqov.
Órt aldyn ala boljam boıynsha, 256 sharshy metr alańda oqshaýlandy. Zardap shekkender týraly aqparat túsken joq.
Buǵan deıin SQO Stýpınka eldi mekeninde órtengen úıden eki eresek adamnyń jáne úsh balanyń denesi tabylǵandyǵyn jazǵan edik.
