Petropavlda Abaıǵa arnalǵan mýral paıda boldy
PETROPAVL. KAZINFORM — Petropavldaǵy Pýshkın jáne Abaı kósheleriniń qıylysynda Abaıdyń 180 jyldyq mereıtoıyna oraı mýral paıda boldy. Kompozıtsııa Qozybaev ýnıversıtetiniń oqý ǵımaratynyń qabyrǵasyna salyndy.
— Abaıdyń mereıtoıyn qazaq eli ǵana emes, barsha adamzat toılap jatyr. Abaı týraly maǵan deıin de, menen keıin de áli talaı aıtylady. Aqyn óz óleńderinde aıtady ǵoı, bir zamanǵa, bir kezeńge arnalmaǵan. Mýral óńirdegi jalǵyz joǵary oqý ornynda ashylyp jatyr. Jastarymyzdyń qasynan ótken saıyn kózi túsip, Abaıdyń sózderin eske túsireri anyq. Ósek, ótirik, maqtanshaq, erinshek, beker mal shashpaq — osy bizdiń boıymyzda bar ma eken dep, adam ózin ózi tekserip, syn kózben qaraı biletin bolsa, sol jolda talaptanyp, bes nárseden qashyq bolamyn, adam bolamyn dep talaptansa — maqsatqa jetkenimiz, — deıdi ashylý saltanatynda bolǵan qoǵam ókili Jomart Omarov.
Qabyrǵaǵa Uly aqynnyń sýreti salynyp, onyń jan-jaǵy ásem oıý-órnektermen bezendirilgen. Sýret eskızderin bizdiń «Qurylys jáne dızaın» kafedrasynyń stýdentteri men oqytýshylary daıyndaǵan.
— Abaıdyń mýralyn jasaý bastamasyn bizdiń stýdentter kóterdi. Ýnıversıtet bolashaq dızaınerlerdi daıarlaıdy. Bul mýraldyń eskızin, tujyrymdamasyn osy stýdentterimiz oqytýshylarynyń kómegimen jasap shyqty. Mýral Abaı men Pýshkın kósheleriniń qıylysynda ornalasqan. Bul kompozıtsııa qala turǵyndaryn, sonyń ishinde jastardy adamgershilikke, adaldyqqa tárbıelep, ádilettilik jáne parasattylyq qaǵıdalaryn ustanýǵa sep bolady dep oılaımyn, — deıdi Qozybaev ýnıversıtetiniń Basqarma tóraǵasy-rektor Erbol Isaqaev.
Buǵan deıin Pavlodarda Abaı murasynyń aýdıojınaǵy jaryq kórgenin jazǵan edik.