Petropavlda abattandyrý erejesin buzǵandar bıyl 1,8 mln teńge aıyppul tóledi

PETROPAVL. KAZINFORM – Petropavlda 12 sáýir kúni jalpyqalalyq aýqymdy senbilik ótedi.

Petropavlda qoqys máselesi ózekti. Byltyr sý tasqynynan zaqym kelgen shaǵyn aýdandarǵa ǵana emes, jalpy qala boıynsha shashylǵan qoqys kóp. 

Petropavl qalasy ákimi Serik Muhamedıevtiń aıtýynsha, byltyr tasqynnan keıin 1800-den astam úı buzylyp, 320 myń tonna qoqys shyǵarylǵan. 

- Aýlalardyń, kóshelerdiń jáne kásiporyndarǵa irgeles aýmaqtardyń mańaıy shashylyp jatyr. Kásiporyndar men dúkenderdiń basshylaryn óz aýmaqtaryn jónge keltirýge shaqyramyn. 

Taǵy bir másele qoqys konteınerleriniń mańyna eski jıhaz, qurylys materıaldaryn tastaý. Mundaı gabarıtti qoqysty turǵyndar arnaıy kólik jaldap, polıgonǵa ózderi shyǵarýy kerek. Al páter ıeleri kooperatıvi men múlik ıeleri birlestikteri muny qadaǵalaýlary kerek, - deıdi qala basshysy.

Abattandyrý erejesin buzǵandardy anyqtaýda polıtsııa reıdter júrgizip jatyr. Nátıjesinde 1764 quqyq buzýshy ákimshilik jaýapkershilikke tartyldy, onyń ishinde 1656 jeke tulǵa jáne 108 zańdy tulǵa. Olar 1,8 mln teńge aıyppul tóledi.

Buǵan deıin Esil basseıniniń sý aıdyndarynda balyqtyń keı túrlerin aýlaýǵa ýaqytsha tyıym salynǵanyn jazdyq.