Petropavlda 94 jastan asqan UOS ardageri vaktsına salǵyzdy
PETROPAVL. QazAqparat – Petropavl turǵyny, Uly Otan soǵysynyń ardageri Nıkolaı Demın koronavırýsqa qarsy vaktsına saldyrtty, qazir qarııanyń jaǵdaıy jaqsy, dep habarlaıdy QazAqparat tilshisi.
Uly Otan soǵysynyń ardageri Nıkolaı Ivanovıch Demın Petropavldaǵy № 2 qalalyq emhanaǵa baryp, vaktsına saldyrtty. Onyń ekpe alǵanyna búgin úshinshi kún.
«Emhanadan habarlasyp, vaktsına saldyrýǵa shaqyrdy. Alǵashqy eki kún ózimdi jaısyz sezindim. Basym aýyrdy, álsizdik bolyp, jattym. Mamandar azdap aýyrýyń múmkin dep meni eskertti. Al búgin ózimdi jaqsy sezinip turmyn. Esh jerim aýyrmaıdy. Ekpe alǵanyma qýanyshtymyn, endi aýyrsam da jeńil ótedi. Sondyqtan barlyǵyn vaktsına qoıdyrýǵa shaqyramyn», - deıdi soǵys ardageri.
Nıkolaı Demın 1943 jyldyń qazanynda 18 jasynda ásker qataryna alynyp, jarty jyldan keıin maıdanǵa attanǵan eken. Jaıaý jáne tank áskerleri quramynda soǵysqan jaýynger jeńisti Lıtva jerinde qarsy alypty. Maıdanda eki ret jaraqattanǵan. Al soǵystan soń zeınet demalysyna shyqqanǵa deıin «Esil sý» kásipornynda eńbek etti.
SQO Densaýlyq saqtaý basqarmasynyń málimetinshe, SQO-da búginge deıin 28 myń adam koronavırýsqa qarsy ekpe aldy. Onyń 7 myńǵa jýyǵy tolyq vaktsınatsııadan ótti.
Mamandardyń aıtýynsha, jalpy KVI juqtyrǵandardyń 30 %-y – 4 158 adam – 60 jastan asqandar.
