Petropavlda 91 jastaǵy zeınetker balalarǵa oıyn alańyn jasap berdi
PETROPAVL. QazAqparat - Petropavl qalasynyń 91 jastaǵy turǵyny Afanasıı Drozdetskıı ózi turatyn aýlany abattandyryp, balalarǵa oıyn alańyn jasap berdi, dep habarlaıdy QazAqparat tilshisi.
Petropavl qalasynyń turǵyny Afanasıı Drozdetskıı osydan 15 jyl buryn ózi turǵan kóp qabatty úıde «Klıýchık» atty páter ıeleri kooperatıvin qurady. Buryn ıesiz jatqan baspanany jónge keltirip, qamys ósip, qoqys úıilgen aýlany abattandyrýdy qolǵa alady. Tóraǵanyń isi kópke úlgi bolyp, turǵyndar da kómek qolyn sozǵan. Osylaısha, 15 jyldyń ishinde balalardyń oıyn alańy tanymastaı ózgerip shyǵa keldi.
«Aldymen qamystan tazarttyq, qum ákeldik. Saý qalǵan átkenshekterdi jóndep, balalarmen birge syrladyq. Meniń maqsatym - balalar elin, jerin súıetin bolyp ósse eken. Sol sebepti alańdaǵy oıynshyqtardyń barlyǵy qazaqy oıý-órnekpen bezendirilgen», - deıdi PIK tóraǵasy Afanasıı Drozdetskıı.
Qazir balalar alańynda Qazaqstan nyshany salynǵan zymyran, ushaq, tipti aıda júretin kólikke deıin bar. Ony byltyr zeınetker kómekshisi, PIK-tiń santehnıgi men aýla sypyrýshysy Baqytjan Ádilovpen birge qolda bar materıaldardan búldirshinderge jasap beripti. Balalar alańyn bezendirýde olar mashınanyń rezeńke dońǵalaqtaryn, túrli taqtaılardy - bárin iske jaratady.
Ásirese jaz mezgilinde túrli átkenshekter men syrǵanaqtar tańnyń atysynan kesh batqansha deıin balalardan bosamaıdy. Kórshi úıdiń búldirshinderi de osy jerde.
«Ata-analarmen aqyldasa otyryp bezendiremiz. Sondaı-aq balalar qaýipsizdigin de umytpaımyz. Qalalyq ákimdik de kómektesip jatyr. Birer jyl buryn qalalyq ákimdik úıdiń mańyndaǵy jol men kólikterdiń turaǵyna asfalt tósep berdi. Endi úıdiń mańyndaǵy qulaıyn dep turǵan aǵashtardy kesip berse degen tilegimiz bar», - deıdi Afanasıı Drozdetskıı.
Balalarǵa ertegi álemin jasap bergen zeınetker búginde ata-analardyń alǵysyna bólenip júr.
