Petropavlda 900-ge jýyq ıesiz jatqan saıajaı ýchaskesi anyqtaldy

PETROPAVL. QazAqparat – Petropavlda ıgerilmeı jatqan jáne maqsatsyz paıdalanylǵan jerler anyqtalyp jatyr. Qala ákimdigi osyndaı 369 ýchaskeni esepke alyp, sonyń 83-in sot arqyly qaıtardy, dep habarlaıdy QazAqparat tilshisi.

Petropavl qalalyq ákimdiginiń málimetinshe, oblys ortalyǵynda aýlalardy abattandyrýǵa, josparly aýmaqtardan garajdardy alýǵa qatysty, sondaı-aq qoqys konteınerlerin qoıatyn oryndardy daıyndaý jumystary bastaldy.

2019-2021 jyldar aralyǵynda 764 garaj kóshirildi, onyń 403-i byltyr alyndy. Mundaı garajdardyń kóbi Jýkov kóshesiniń boıynda.

Bıyl jyl basynan 32 aýla aýmaǵy tekserildi, nátıjesinde ruqsatsyz ornatylǵan 38 garaj anyqtaldy. Jalpy osy jyly 430 garajdy buzý josparlanǵan.

«Qazirgi problemalardyń biri - menshik ıelerin anyqtaý, sondaı-aq kondomınıým aýmaǵynda garajdardyń ornalasý máselesi. Materıaldardy jınap, keıinnen ınspektsııaǵa tekserý úshin jiberý kerek. Saldarynan zańsyz turǵan garajdardy aýmaqtan alý uzaq ýaqytty qajet etedi. Áleýmettik nysandardyń, jylý magıstraldarynyń jáne asfalttaýǵa kezekte turǵan aýlalardan turǵyndar óz erkimen ornatqan garajdardy alýlary tıis», - deıdi ákimdik mamandary.

Budan basqa oblys ortalyǵy aýmaǵynda bos jatqan ýchaskelerdi anyqtaý jumystary da jalǵasady. Sońǵy úsh jyldyń ishinde ınspektsııaǵa ıgerilmeı jatqan jáne maqsatsyz paıdalanylǵan jer boıynsha 369 materıal jiberilgen. Nátıjesinde 83 ýchaske sot arqyly qaıtaryldy.

Mundaı jumystar saıajaı seriktestikterinde de atqarylyp jatyr. 2019-2021 jyldar aralyǵynda bos jatqan 896 saıajaı ýchaskesi eseepke alyndy.