Petropavlda 900 balaǵa shaqtalǵan zamanaýı mektep paıdalanýǵa berildi

PETROPAVL. QazAqparat – Petropavlda Bilim kúni 900 oqýshyǵa arnalǵan jańa mektep esigin aıqara ashty, dep habarlaıdy QazAqparat tilshisi.

Bul jaıynda Soltústik Qazaqstan oblysynyń ákimi Qumar Aqsaqalov Facebook áleýmettik jelidegi óz paraqshasynda jarııalady.

«Bilim kúnine oraı balalarǵa jaqsy syılyq boldy. Búgin Petropavlda 900 oqýshyǵa arnalǵan zamanaýı mektep ashyldy. Ýálıhanov kóshesindegi jańa bilim mekemesi osy shaǵynaýdandaǵy 3 mekteptegi júktemeni azaıtyp, balalar men muǵalimderge qolaıly jaǵdaı týǵyzady.

Jańa mektepterge suranys bar, sebebi oblysta oqýshylar sany jyl saıyn kóbeıip keledi. Bıyl 75 myń bala mektepke bardy, bul 2020 jylmen salystyrǵanda 3 myńǵa kóp», - dep jazdy Qumar Aqsaqalov.

Óńir basshysynyń aıtýynsha, bul sońǵy jyldary oblysta salynǵan tórtinshi mektep.

«Biz aýyldarda eki mekteptiń qurylysyn bastaımyz. Oblys ortalyǵynda 1200 oryndyq mektep pen erekshe balalarǵa arnalǵan mektep-ınternat paıda bolady. Jalpy, keshendi jospar aıasynda aldaǵy jyldary 16 jańa mektep salý josparlanǵan. ⠀

Jańa mektep «Ortalyq» shaǵynaýdanynda ornalasqan. Bul shaǵynaýdannyń bolashaǵy zor. Eski jáne apatty úılerdiń ornyna jańa kópqabatty úıler turǵyzylyp jatyr, balabaqsha salynady. Ýálıhanov kóshesi keńeıtilýde. 3 myń oryndyq jańa sport saraıy shaǵynaýdannyń sánine aınalady. Sport nysanynyń janynan jańa saıabaq ashamyz», - dedi SQO ákimi Qumar Aqsaqalov.