Petropavlda 87 jastaǵy áje qutqaryldy
PETROPAVL. QazAqparat - Petropavlda qutqarýshylar 87 jastaǵy áıeldi ólimnen aman alyp qaldy, dep habarlaıdy QazAqparat tilshisi.
SQO Tótenshe jaǵdaı departamenti baspasóz qyzmetiniń habarlaýynsha, oqıǵa Petropavl qalasynda naýryzdyń 4-i bolǵan. Býketov kóshesindegi 5 qabatty úıdiń turǵyny ıÝrıı Fılnık egde jastaǵy kórshisin bes kúndeı kórmegennen keıin qutqarýshylardy shaqyrypty. Oqıǵa ornyna jedel jetken mamandar esikti tarsyldatqanymen eshkim ashpaǵan.
«Esikti buzbaı, tereze arqyly kirýge sheshim qabyldadyq. Óıtkeni mundaıda ár mınýt sanaýly. Tórtinshi qabattan ekinshi qabatqa túsip, páterge kirdim. Qarasam jerde áıel jatyr. Esi kiresili-shyǵasyly. Birden esikti ashyp, zeınetkerge alǵashqy medıtsınalyq kómek kórsettik», - deıdi qutqarýshy Rasýl Jılıaev.
Kórshileriniń aıtýyna qaraǵanda, páterdiń ıesi Emma Anatolevna jalǵyz turady eken. 87 jastaǵy áıel qant dıabetiniń asqynǵan túrimen aýyrady. Qutqarýshylar jedel járdem qyzmetin shaqyryp, olar zeınetkerdi aýrýhanaǵa áketti. Olardyń aıtýynsha, endi keshikkende áıeldi qutqarý neǵaıbyl edi.
«Bizdiń kúndelikti jumysymyzda neshe túrli oqıǵa bolyp jatady. Adamdarǵa kómektesý - bizdiń mindetimiz. Degenmen osy jaǵdaı bizdiń jadymyzda uzaqqa saqtalary anyq», - deıdi jedel-qutqarý jasaǵynyń qutqarý bólimshesiniń jetekshisi Ildar Haırýtdınov.
