Petropavlda 84 jastaǵy keıýana óz páterinde órtenip ketti
PETROPAVL. QazAqparat – Petropavlda 9 qabatty úıden órt shyǵyp, 84 jastaǵy áıel mert boldy, dep habarlaıdy QazAqparat tilshisi.
Soltústik Qazaqstan oblystyq Tótenshe jaǵdaılar departamenti baspasóz qyzmetiniń málimetinshe, búgin saǵat 10.30 shamasynda «101» qyzmetine Koshýkov kóshesi, 7 meken jaıyndaǵy 9 qabatty úıdiń úshinshi qabatynan órt shyqqandyǵy jóninde habarlanǵan.
Órt sóndirýshiler jetken kezde páter jalyndap janyp jatqan. Qutqarýshylar men polıtsııa qyzmetkerleri 8 adamdy, sonyń ishinde eki balany qaýipsiz jerge shyǵardy.
Oqıǵa ornynan páterdiń ıesi - 1936 jyly týǵan áıeldiń denesi tabyldy.
Jalynmen kúreske 20 adam jáne 6 tehnıka jumyldyryldy. Saǵat 11.00 shamasynda jalyn tolyq sóndirildi.
Órttiń saldarynan dúnıe-múlikke zaqym keldi. Qazirgi ýaqytta oqıǵanyń sebebi men kelgen shyǵyn kólemi anyqtalyp jatyr.
