Petropavlda 82 jastaǵy zeınetkerge qaraqshylyq shabýyl jasaǵan kúdiktiler ustaldy
PETROPAVL. QazAqparat - Petropavlda 82 jastaǵy zeınetker men onyń kútýshisine qaraqshylyq shabýyl jasalyp, polıtseıler qylmysty ashty, dep habarlaıdy QazAqparat tilshisi.
SQO polıtsııa departamenti baspasóz qyzmetiniń habarlaýynsha, oqıǵa mamyrdyń 17-sinde bolǵan. Belgisiz ekeý Nevskıı kóshesindegi úıge terezeni syndyryp kiripti. Úıdegi zeınetker men onyń kútýshisin baılap, soqqyǵa jyǵyp, aqsha talap etken.
«Aqsha qaıda? Altyn bar ma?» dep aıqaılady. Sodan keıin baılap tastady», - deıdi jábirlenýshiler.
Qylmyskerler úıden tapqan jarty mln teńgeden astam aqshany jáne kútýshiniń sómkesin alyp, taıyp turǵan. Olar ketkennen keıin áıelder birden polıtsııaǵa habarlasqan.
Qaraqshylyq shabýyldy ashýǵa barlyq jedel bólinister tartyldy. Polıtseıler barlyq kúdikti tulǵalardy tekserip, tirnektep aqparat jınady. Qylmyskerlerdi tabýda beınekameralardyń da kóp kómegi tıgen. Nátıjesinde kúdiktiniń bireýi - Petropavl qalasynda, ekinshisi - el astanasynda ustaldy.
«Jedel-izdestirý sharalary barysynda Petropavl qalasynyń turǵyndary, buryn sottalǵan eki azamat qolǵa tústi. Bireýiniń jasy - qyryqta, tonaý men qaraqshylyq úshin buryn isti bolǵan. Qazir elordada turady. Ekinshisi - 48 jasta, esirtki satqany úshin jaýapqa tartylǵan. Qazirgi tańda kúdiktiler qamaýǵa alyndy. Tergeý sharalary júrgizilip jatyr», - deıdi Petropavl qalalyq polıtsııa basqarmasy Ekinshi polıtsııa bóliminiń jedel ýákili Garıf Hamzaev.
Qazirgi ýaqytta QR Qylmystyq Kodeksiniń 192-baby, 2-bóligi «Qaraqshylyq» boıynsha sotqa deıingi tergeý júrgizilýde.
Jalpy, jyl basynan beri oblysta 5 qaraqshylyq shabýyl tirkelgen. Ol qylmystardyń barlyǵy ashyldy.
