Petropavlda 81 jastaǵy áıel úshinshi qabattyń terezesinen qulap kete jazdady
PETROPAVL. QazAqparat – Petropavldyń 81 jastaǵy turǵyny óziniń týǵan kúni qarsańynda úshinshi qabattaǵy úıiniń terezesinen qulap kete jazdady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Internatsıonal kóshesindegi kópqabatty úılerdiń biriniń terezesinen ájeıdiń kómek surap jatqany jaıynda «102» arnasyna ótip bara jatqandar habarlaǵan.
Oqıǵa tańǵy saǵat 10.00 shamasynda bolǵan. Petropavl turǵyny 81 jastaǵy áıel belgisiz sebeptermen úshinshi qabattaǵy úıiniń terezesine shyqqan.
Óz betinshe túse almaǵan ájeıge sol úıde ornalasqan «Mechta» tehnıka dúkeniniń qyzmetkerleri men patrýldik polıtseıler kómekke kelip úlgerdi.
«Polıtsııa qyzmetkerleri kelgen kezde dúken shatyrynyń ústinde saýda úıiniń qyzmetkerleri Denıs Grıgorev pen Ivan Baranovskıı bolǵan. Barlyǵy birlese zeınetkerdiń terezeden aman-esen túsýine járdemdesti. Osy ýaqytta jedel járdem qyzmeti de kelip jetti. Ájeı jalǵyz turady eken. Onyń nelikten terezege mingeni naqty belgisiz» delingen baspasóz habarlamasynda.
