Petropavlda 80 saıajaıdy sý basty
ASTANA. QazAqparat - Petropavlda Esil ózeniniń jaǵasynda ornalasqan 80 saıajaı sý astynda qaldy, dep habarlaıdy «QazAqparat» tilshisi.
Petropavl qalasynyń irgesinde ornalasqan Zarechnyı kenti men respýblıkalyq mańyzy bar «Chelıabi-Novosibir» tas jolyna jaqyn mańda Esil ózeniniń deńgeıi kóterilip, erneýinen asyp jatyr. Jol ústin basqan sýdyń tereńdigi 50 santımetrge jetti. Bul ýchaskede 25 sáýirden beri jeńil kólikter úshin jol qozǵalysy shekteldi.
«Chelıabi-Novosibir» tas jolynyń 529-shy shaqyrymy da ózen sýynyń astynda qaldy. Joldyń shamamen 30 metr bóligin tereńdigi 5-8 santımetr sý basty.
Qazir atalǵan aýmaqtarǵa arnaıy jol belgileri ornatylyp, polıtseıler kezekshilik atqarýda. Oblystyq mańyzdaǵy KT-4 «A-16-Novonıkolsk-Andreevka» tas joly barlyq kólik túrleri úshin jabyq.
Qazir ózenniń joǵary jaǵynda sý deńgeıi tómendep keledi. 19 sáýir kúni Sergeev sý qoımasyndaǵy sý deńgeıi 168 santımetrge kóterilse, búginde bul kórsetkin 81 santımetrge deıin tústi.
SQO TJD baspasóz qyzmetiniń málimdeýinshe, tasqyn keıbir eldi mekenderge jaqyndaǵanymen, úılerdi sý alý faktisi tirkelgen joq.
«Jaǵdaıdy qadaǵalaý maqsatynda Esil ózenine jaqyn ornalasqan eldi mekenderde, atap aıtar bolsaq, Qyzyljar aýdanynyń Semıpalatnoe, Novokamenka, Báıterek, Teplıchnoe, Sokolovka, Dolmatovo aýyldarynda, Petropavldyń Zarechnyı kenti men Bylǵary zaýytynda táýlik boıy arnaıy mamandar kezekshilik atqarýda. TJD-nyń jedel-shtaby jumys isteıdi. Kútpegen jaǵdaı bola qalsa, azamattar 112 telefonyna habarlasa alady. Ata-analarǵa balalaryn kózden tasa qylmaýǵa keńes beremin», - dedi SQO TJD baspasóz hatshysy Evgenıı Jýravlev.
