Petropavlda 80-nen astam kópqabatty úı jylytý maýsymyna áli daıyn emes
PETROPAVL. KAZINFORM – Petropavlda barlyǵy 1 198 kóppáterli turǵyn úı ortalyq jylý júıesine qosylǵan bolsa, sonyń 1112-si ǵana tehnıkalyq turǵydan jylý qabyldaýǵa ázir.
Petropavl qalalyq ákimdiginiń málimetinshe, qazirgi ýaqytta Páter ıeleriniń kooperatıvi men múlik ıeleri birlestiginiń tóraǵalary qyzmet kórsetýshi uıymdarmen birlesip, kóppáterli turǵyn úılerdi qysqy maýsymǵa daıyndaý jumystaryn júrgizip jatyr.
- Biz jeti kóp qabatty úıge qyzmet kórsetemiz. Qazir jylytý maýsymyna daıyndalyp, úılerdiń jylý júıelerin jýyp, qysymmen tekserip jatyrmyz. Bul óte mańyzdy. Sondaı-aq ǵımarattardyń shatyryn tekseremiz. Erteń kóktemde sý aǵyp, turǵyndardyń mazasyn almaýy úshin. Káriz júıesin de apattyq jaǵdaılar bolmaýy úshin tekserip jatyrmyz, - deıdi kóp qabatty úılerge qyzmet kórsetetin kompanııanyń ókili Tımýr Jetpisov.
Ázirge Petropavlǵa jylýdyń naqty qaı kúni beriletini belgisiz. Qala ákimi tıisti qaýlyǵa qol qoıǵan joq.
- Jylytý júıesi táýlik ishindegi ortasha aýa temperatýrasy úsh kún qatarynan +10°C-tan tómen bolǵan jaǵdaıda iske qosylady.
Jylytý maýsymyn qyrkúıek aıynyń sońynda nemese qazan aıynyń basynda bastaý josparlanyp otyr. Alaıda naqty merzim aýa raıynyń qalyptasýyna baılanysty anyqtalady, - dedi qala ákiminiń baspasóz hatshysy Tımýr Jumanov.
«Qazgıdromet» kásipornynyń málimetinshe, óńirde aldaǵy úsh kún boıy jaýyn-shashyn saqtalǵanymen, kúndiz synap baǵanasy +21 gradýsqa deıin kóterilmek.
Buǵan deıin Premer-mınıstr Oljas Bektenovtiń tóraǵalyǵymen ótken keńeste aldaǵy jylytý maýsymyna daıyndyq barysy qaralǵanyn jazǵan edik.
