Petropavlda 8 jasar qyzdy zorlaǵan kúdikti aqyl-esiniń durys emestigine baılanysty jazadan qutyldy

PETROPAVL. QazAqparat – Soltústik Qazaqstan oblysynyń qylmystyq ister jónindegi mamandandyrylǵan aýdanaralyq soty 8 jasar qyzdy zorlaǵan qylmyskerge qatysty sheshim shyǵardy, dep habarlaıdy QazAqparat tilshisi.

SQO-nyń qylmystyq ister jónindegi mamandandyrylǵan aýdanaralyq soty «zorlaý jáne kámeletke tolmaǵandarǵa qatysty jynystyq sıpattaǵy ózge de is-áreketter» baby boıynsha sottalýshy Ivan Malchenkoǵa qatysty qylmystyq isti qarady.

Oqıǵa byltyr 13 shilde kúni boldy. 1995 jyly týǵan Ivan Malchenko Petropavldaǵy Oıqala shaǵyn aýdanynda 8 jasar qyzdy zorlady.

Er adam 2004 jyldan bastap psıhıkalyq aýrýyna baılanysty psıhıatrııalyq aýrýhanada esepte turǵan. Buǵan deıin birneshe ret sottalǵan, sońǵy ret aýyr qylmys jasaǵan ol 2021 jyldyń jeltoqsanynan bastap Olshanka aýylynda qaýipsizdigi tómen mekemege aýystyrylǵan. Qylmysqa jazasyn ótep júrip barǵan.

«Sot-medıtsınalyq saraptama keshendi túrde júrgizilip, Malchenko biraz ýaqyt baqylaýda boldy. Qoǵamdyq qaýipti áreket jasaǵan onyń sol kezde esiniń durys bolmaǵany anyqtaldy», - dedi SQO Qylmystyq ister jónindegi mamandandyrylǵan aýdanaralyq sotynyń sýdıasy Erlan Nursháripov.

Prokýror, jábirlenýshiniń ókilderi jáne sottalýshyny qorǵaýshylar Malchenkony qylmysty aqylsyz kúıde jasaǵany úshin qylmystyq jaýaptylyqtan bosatýdy jáne medıtsınalyq sıpattaǵy májbúrleý sharalaryn qoldanýdy surady.

Sot qylmystyq zańmen tyıym salynǵan áreketterdi er adamnyń esi durys emes jaǵdaıda jasaǵanyn dáleldeı otyryp, ony qylmystyq jaýaptylyqtan bosatty. Malchenkoǵa mamandandyrylǵan úlgidegi psıhıatrııalyq statsıonarda májbúrlep emdeý túrindegi medıtsınalyq sıpattaǵy shara qoldanylady.

Sot sheshimi zańdy kúshine engen joq.