Petropavlda 700-den astam zaýyt jumysshysy eki aı berilmegen jalaqylaryn aldy

PETROPAVL. QazAqparat - Petropavldaǵy «Zıksto» aktsıonerlik qoǵamy jumysshylaryna eńbekaqy boıynsha bereshegin tolyq qaıtardy, dep habarlaıdy QazAqparat tilshisi.

Soltústik Qazaqstan oblystyq prokýratýra baspasóz qyzmetiniń habarlaýynsha, Petropavl qalasy prokýrorlarynyń aralasýynan keıin kásiporyn 700-den astam jumysshysyna eki aıdyń eńbekaqysyn tóledi. Berilgen soma 100 mln teńgeden asady.

«Zıksto» AQ zań buzýshylyqtardy anyqtaǵan prokýrorlar eńbek ınspektsııasymen birlese áreket etip, zaýyttyń basshylyǵymen jáne jumysshylarmen kezdesti. Nátıjesinde eńbekaqy boıynsha kásiporyn bereshegi tolyǵymen óteldi.

«Zıksto» AQ eki aı eńbekaqy almaǵan jumysshylary Quqyq qorǵaý qyzmeti ortalyǵyna aryzdanyp, máselege prokýratýra, eńbek ınspektsııasy, oblystyq ákimdik aralasqanyn aıtqan edik. Zaýyt basshylyǵy aı sońyna deıin qaryzdy jabýǵa ýáde etip, sózinde turdy.