Petropavlda 70 myń teńge qaryzy úshin turǵynnyń páteri aýktsıonnan satyldy
PETROPAVL. QazAqparat – Petropavl turǵyny energetıkterge bereshegi úshin pátersiz qaldy, dep habarlaıdy QazAqparat tilshisi.
«SEVKAZENERGO» AQ baspasóz qyzmetiniń málimetinshe, tutynýshynyń «Sevkazenergosbyt» JShS qaryzy 69 469 teńge bolǵan. Bereshegin qaıtarýǵa asyqpaǵan boryshkerdiń páterin sot aýktsıonnan satyp, qaryzdy óndirip alýǵa sheshim shyǵardy.
Qazirgi ýaqytta tutynýshylardyń kompanııaǵa debıtorlyq bereshegi 249 mln 472 myń teńgege jetken. Onyń 106 mln 470 myń teńgesi páter ıelerine tıesili. Qordalanǵan qaryzdy qaıtarý maqsatynda energetıkter tótenshe sharalardy qoldana bastady. Máselen bıyl jeke sot oryndaýshylary boryshkerlerge qatysty qaryzdy qaıtarý tártibin ózgertýge 12 uıǵarym ázirlep, nátıjesinde 6 baspana aýktsıon arqyly satyldy.
«Boryshkerge qaryzy týraly habarlama jiberiledi. Sol ýaqytta qaryz ıesiniń dúnıe-múlkine shekteý qoıylyp, esep-shottary, jumys orny, zeınetaqy shotyndaǵy qarajaty týraly málimet jınalady. Eskertýge qaramastan qaryzdy jaqyn arada qaıtarmasa, al qaryzy 20 AEK joǵary bolsa el aýmaǵynan shyǵýyna shekteý qoıylady. 250 AEK mólsherinde bereshegi bar adam dáleldi sebepsiz boryshyn qaıtarmasa, oǵan lıtsenzııalardyń, ruqsattardyń jáne arnaıy quqyqtardyń berilýi men qoldanylý merzimine ýaqytsha shekteýler qoıylady», - deıdi «Sevkazenergosbyt» JShS zań bóliminiń bastyǵy Maksım Pýsev.
Kásiporyn mamandarynyń aıtýynsha, qaryzdy qaıtarýda kóptegen is-sharalar qoldanylady, alaıda boryshkerdiń dúnıe-múlkine shekteý qoıǵanda ǵana ol óz nátıjesin beredi eken.
«Eger tutynýshynyń materıaldyq jaǵdaıy qıyn bolsa, biz árıne olarǵa keńshilik jasaımyz. Bólip tóleýi úshin keste jasap beremiz. Jaryq pen jylýdy aýadan alyp jatqan joqpyz. Kompanııa energııany óndirý úshin qondyrǵylardy únemi jańartyp otyrýy qajet, otyndy satyp alamyz. Tutynýshylardyń qaryzy myńdap emes, mıllıon teńgelep sanalady. Olardyń kommýnaldyq aqyny ýaqtyly tólemeýinen qarjy jetispeýshiligi týyndaıdy, saldarynan nesıe alýǵa májbúrmiz. Al bul óz kezeginde tarıfke áser etedi», - dedi «Sevkazenergosbyt» JShS bas dırektory mindetin atqarýshy Maǵaýııa Saǵyndyqov.
Petropavlda jyl basynan beri boryshkerlerdiń 6 páteri aýktsıon arqyly satylsa, jyl sońyna deıin olardyń qataryna taǵy úsheýi qosylýy múmkin.
