Petropavlda 7 jasar balany júk kóligi qaǵyp ketti
PETROPAVL. QazAqparat – Petropavlda «GAZ» júk kóliginiń júrgizýshisi joldy kesip ótpek bolǵan 7 jasar balany soǵyp ketti, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, oqys oqıǵa 5 mamyr kúni shamamen saǵat 13.40-ta N.Nazarbaev kóshesinde bolǵan. «GAZ» júk kóliginiń 32 jastaǵy júrgizýshisi rettelmeıtin jaıaý júrginshiler qıylysynda joldy kesip ótip bara jatqan birinshi synyp oqýshysyn baıqamaı, qaǵyp ketken.
Bala oblystyq balalar aýrýhanasyna jetkizildi. Búldirshin aman. Ata-anasy júrgizýshige qatysty narazylyq bildirýden bas tartty.
Polıtseıler «Jaıaý júrginshilerdiń nemese jol júrisiniń ózge de qatysýshylarynyń júrýine basymdyq bermeý» baby boıynsha materıal jınastyrdy, júrgizýshige aıyppul salyndy.
«Tártip saqshylary oqýshylarmen jáne ata-analarmen kezdesý ótkizdi. Oqýshylardy jolda qaýipsizdikti saqtaý týraly eskertip, ata-analarǵa qaýipsiz «úı-mektep» baǵytyn qurýǵa kómektesti. Jyl basynan oblystyń oqý oryndarynda polıtseıler 623 kezdesý ótkizip, jadynamalar taratty. Jazǵy demalys qarsańynda «Nazar aýdaryńyz, balalar!» respýblıkalyq jedel-profılaktıkalyq is-sharasy ótkiziledi», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
