Petropavlda 7 muz qalashyǵy salynyp jatyr - fotoreportaj
Petropavlda Jańa jyl merekesine oraı kóshelerdi bezendirý jumystary júrip jatyr. Bıyl da bul maqsatqa bıýdjetten bir tıyn jumsalmaıdy, dep habarlaıdy Kazinform.
Petropavl turǵyndary men qonaqtaryna merekelik kóńil kúı syılaý maqsatyndaǵy bezendirý jumystarynyń qazir naǵyz qyzǵan shaǵy. Bıyl oblys ortalyǵynda jeti muz qalashyǵy salynyp jatyr. Bul – byltyrǵydan ekeýge kóp.
Bas alańda tórt brıgada jumys istep jatyr. Biri syrǵanaqty qursa, endi biri muz kirpishten qabyrǵa kóterýdi qolǵa alǵan. Músinshi Ertýǵan Shaımaǵanbetov Astana qalasynan kelipti. Petropavlda tórtinshi jyl qatarynan jumys istep jatyr. Onyń brıgadasy muzdan jasalatyn nysandarǵa jaýapty. Úsh kún buryn iske kirisken 20 adam birer kúnde ózderine júktelgen mindetti oryndap, tapsyrmaq.
«Astana qalasyndaǵy úlken muz qalashyqtaryn quryp júrmiz. Sonyń biri – Qazaqstan sport kesheniniń janynda ornalasty. Qazir bekitilgen dızaın boıynsha bas alańdaǵy muz qalashyǵyna kireberisti qalap jatyrmyz», - deıdi Ertýǵan Shaımaǵanbetov.
Bıyl muz qalashyǵynyń qurylysynda azdaǵan qıyndyq bar. Mamandardyń aıtýynsha, muz erekshe qurylys materıaly bolǵandyqtan, ekiniń biri onymen jumys istegisi kelmeıdi. Máselen, búgin Petropavlda aýa temperatýrasy +1 gradýsty kórsetip tur. Saldarynan muz kirpishter jabyspaı jatyr.
«Ekinshi másele, kún jylynǵan saıyn muz synǵysh keledi. Qatty aıaz da jaramaıdy, mundaıda adamdarǵa jumys isteý ońaı emes. Bizge qolaıly temperatýra -20 gradýstyń mańaıy. Qazir kúnniń jyly bolýyna baılanysty jumysymyz saıabyrsyp qaldy», - deıdi sýretshi-músinshi Ǵalymjan Baltaev.
Bul salada 20 jyldan artyq júrgen Ǵalymjan Baltaevtyń aıtýynsha, elimizde osy muz qalashyqtaryn salýda ulttyq bolmysymyzǵa tán belgili bir dızaındy qoldanatyn ýaqyt jetti.
«Táýelsiz memleket bolǵannan keıin sony aıshyqtap turatyn, barlyq halyqqa belgili bolatyndaı ulttyq joba jasaý kerek. Bul mereke bizge Eýropa, Reseıden kelgendikten, kóbine solardyń reńkin qoldanamyz. Ol úshin músinshiler arasynda baıqaý jarııalasa, úzdikterin tańdap, sony qoldansaq. Qytaılardy alsaq, olar ózderiniń aıdaharyn únemi qoldanady. Bizde óz ereksheligimizdi aıshyqtaıtyn osyndaı keıipker joq, bolsa da umyt qalyp jatady», - deıdi ol.
Al mynaý 30 metrlik shyrshanyń túbi. Dıametri – 12 metr. Qazir jumysshylar onyń qańqasyn ornatyp jatyr. Keıin eń negizgi jumys – bezendirýge kirisedi.
«Biz de Astanadan keldik. Shyrshany tórtinshi kún quryp jatyrmyz. Ótken jylǵy shyrsha bezendirýinen azdaǵan ózgeris bolady. Oıynshyqtary daıyn. Budan basqa Petropavl qalasy boıynsha 4 shyrsha quramyz. Olardyń bıiktigi 17-18 metr bolady», - deıdi montajdaý brıgadasynyń brıgadıri Jangeldi Іlııasov.
Petropavl qalalyq ákimdigi baspasóz qyzmetiniń málimetinshe, meıramnyń basty belgisi – shyrsha bas alańǵa, ortalyq alańǵa, Pestroe kóliniń janyna, Jeńis saıabaǵyna, saparjaı, «Bereke» shaǵyn aýdandaryna, N. Nazarbaev jáne G. Jýkov kósheleriniń qıylysy janyndaǵy alańǵa ornatylady. Sondaı-aq balalardyń qysqy demalysty qyzyqty ótkizýi úshin bıik syrǵanaqtar, labırıntter salynyp, muz músinder, shaǵyn sáýlet nysandary ornatylady.
Al basty shyrshanyń shamdary jospar boıynsha birer kúnde saltanatty túrde jaǵylmaq.
