Petropavlda 63 adam maskúnemdikten májbúrlep emdelýge jiberildi
PETROPAVL. QazAqparat – Petropavl polıtseıleri jyl basynan beri 63 adamdy maskúnemdikten májbúrli túrde emdelýge jiberdi, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavlda spırttik ishimdikti ishý barysynda 22 adam aýyr dene jaraqatyn alǵan.
Jalpy jyl basynan oblys ortalyǵynda alkogoldik mas kúıde jasalǵan 190 qylmys tirkelgen. Budan bólek, otbasylyq janjaldardyń basym bóligi «aşy sýdyń» kesirinen bolady, qańtar aıynan oblys ortalyǵynda osyndaı myńǵa jýyq janjal tirkelgen. Qala kóshelerinde 206 mas júrgizýshi ustalǵan, olardyń árqaısy jol-kólik oqıǵasyna sebepshi bolýy múmkin.
Ýchaskelik polıtsııa ınspektorlary qylmystyń aldyn alýda spırttik ishimdikke táýeldi adamdardy májbúrlep emdeýge jiberý sharasyn qoldanady.
«Spırttik ishimdikti asyra ishý – qylmystardyń jasalýyna túrtki bolatyn faktorlardyń biri. Sondyqtan otbasynda araq ishetin adam bolsa, ony emdetpeı úıdiń berekesi bolmaıdy. Aldymen maskúnemniń jaqyndaryna emhanaǵa ótinish jazý kerek. Týystary maskúnemniń túzelem degen ýádesine birazǵa deıin senip, bul qadamǵa bara qoımaıdy. Ýchaskelik ınspektorlar týystaryna maskúnemdi emge jiberý rásimin túsindirip, medıtsına qyzmetkerlerine kómek kórsetedi. Jyl basynan Petropavldan májbúrlep emdelýge 63 adam jiberildi», - deıdi Petropavl qalalyq polıtsııa basqarmasy JPQ bólimi bastyǵynyń orynbasary Aıdyn Aqmaǵambetov.
Petropavl polıtseıleri bıyl spırtti zańsyz satqany úshin 65 adamdy, alkogoldi túngi ýaqytta, lıtsenzııasyz, kámeletke tolmaǵandarǵa satqany úshin 27 dúken ıesin jaýapqa tartty. Spırttik ishimdikti ishkeni nemese qoǵamdyq orynda mas kúıde júrgeni úshin 3 700 adam jaýapkershilikke tartyldy. Zańsyz aınalymnan 15 myń lıtrden astam alkogol alyndy.
