Petropavlda 60 shaqty soǵys ardageri mereke qarsańynda syıaqy aldy
PETROPAVL. QazAqparat – Petropavlda búgin Ekinshi Dúnıejúzilik soǵysy, Aýǵan soǵysy jáne tájik-aýǵan shekarasyndaǵy soǵys ardagerleri 100 myń teńgeden syıaqy aldy, dep habarlaıdy QazAqparat tilshisi.
Petropavlǵa Qazaqstandaǵy Reseı Federatsııasy elshiliginiń jáne QR Aýǵan jáne jergilikti soǵys ardagerleri odaǵynyń ókilderi kelip, qarttardy qoldaý aılyǵy aıasynda ardagerlerdi quttyqtady. Sondaı-aq 60-tan astam adamǵa 100 myń teńgeniń sertıfıkatyn syılady.
Marapatqa ıe bolǵandardyń biri – petropavldyq Aleksandr Kýrkın. Ol 1979 jyly ásker qataryna alynyp, Aýǵanstanǵa soǵysqa jiberiledi. Ardagerdiń aıtýynsha, Kabýlda 345 polk quramynda soǵysyp, jarty jyldan keıin jaraqat alýyna baılanysty elge qaıtarylǵan. Keıin densaýlyǵy syr bergenshe deıin kólik júrgizýshisi bolǵan. Jalpy bul kúni Aleksandr sııaqty taǵy aýǵan soǵysynyń 30 ardageri, Ekinshi Dúnıejúzilik soǵysynyń kózi tiri 23 ardageri jáne tájik-aýǵan shekarasyndaǵy soǵysqa qatysqan 10 adam syıaqy aldy.
«Nur-Sultan qalasynan arnaıy kelip óńirden soǵysqa attanǵan, jaýyngerlik áreketterge qatysqan ardagerlerdi quttyqtap jatyr. Aýǵan soǵysynyń 30 ardagerin tizimnen tańdap aldyq, olar kómekke muqtaj jandar. Sondaı-aq Uly Otan soǵysynyń ardagerleri de umyt qalǵan joq», - deıdi oblystyq ardagerler keńesiniń tóraǵasy Eskendir Eleýsizov.
Óńirdegi Ekinshi Dúnıejúzilik soǵys ardagerleriniń onǵa jýyǵy – ǵasyr qurdastary. Arasynda ózdiginen júre almaıtyndary da bar. Olarǵa syıaqyny delegatsııa músheleri úılerine aparyp berdi.
Buǵan deıin SQO-da 104 myńnan astam zeınetkerdiń bar ekenin, Qarttar kúnine oraı jalǵyzilikti qarııalarǵa otyn-kómir, azyq-túlik, dári-dármek jetkiziletinin aıtqan edik.
