Petropavlda 60 otbasy satyp alǵan páterlerine birneshe aıdan beri kire almaı otyr
PETROPAVL. KAZINFORM – Petropavlda memlekettik baǵdarlamamen páter alǵan áskerı qyzmetshiler, qutqarýshylar men polıtsııa ókilderi áli kúnge baspana jaldap turýǵa májbúr.
Páter kiltin sáýir aıynda alýy tıis turǵyndardyń qonys toıyn qashan toılaıtyny belgisiz.
Dana Salyqovanyń joldasy áskerı qyzmetshi. Jas otbasy búgin-erteń jalǵa alyp turyp jatqan páter úshin 150 myń teńge tóleýi kerek. Birer kúnnen keıin bankke 335 myń teńge tólem jasaýy tıis. Maýsym aıynda «Anel-2» turǵyn úı kesheninen eki bólmeli páterdi ıpotekaǵa alǵan olardyń endi óz baspanalaryna qashan kireri belgisiz.
- Merdiger kompanııa áne-mine dep sozyp aldy. Salynǵan úıde aıtarlyqtaı problema joq. Tek tolyq aıaqtamaı jatyp bergen. Saldarynan biz kire almaı otyrmyz. Ol kompanııanyń budan basqa salyp jatqan nysany bar. Bar qurylysshylar qazir sonda júr. Al bizdiń úıge ýaqyttary joq, - deıdi Dana Salyqova.
Kúnde «erteńnen» sharshaǵandardyń biri – Aına Serbaeva.
Qala turǵynynyń aıtýynsha, «TehEvroStroı» qurylys kompanııasymen 2025 jyldyń qyrkúıeginde kelisimge otyrǵan. Merdiger 2 bólmeli páterdi tolyq daıyn kúıinde berýge ýáde etken.
- Men eki bólmeli páter úshin qolma-qol tólem jasadym. Kompanııa baspanany resmı túrde sáýirde berýi kerek eken, bizge qańtar aıynda paıdalanýǵa beremiz dep aıtty. Qurylys jaqsy júrip jatty, sol sebepti osy úıdi tańdadyq. Biraq barlyǵy bul kompanııa Bolatbaev kóshesinde jańa nysannyń qurylysyna kiriskende ózgerip sala berdi, - deıdi Petropavl turǵyny.
Aına Serbaevanyń aıtýynsha, turǵyn úıdiń qurylysyn tolyq aıaqtaýdy talap etken olarǵa kásipker dóreki sóılegen.
- Jaman sózder aıtty. «Aqshalaryńdy qaıtaryp alyńdar, men eshkimnen de, prokýratýradan da, ákimdikten de qoryqpaımyn» dedi.
Al kóktemde mámilege otyrýǵa shaqyrdy. Notarıýs úıdiń qujattary daıyn dedi. Ne káriz, ne sýmen qamtý júıesi joq, qalaı qujat aldyńyz dep suraǵanymda, taǵy da til tıgizdi.
-Keıin «kútińder, jumysty aıaqtaımyn» dep aıtty. Kúter edik, biraq qurylys alańynda eshki joq qoı, - deıdi Aına Serbaeva.
Turǵynnyń qurylys sapasyna da kóńili toımaıdy.
Al qurylys kompanııasy ókili Ilıa Shımanskııdiń túsindirýinshe, nysannyń ýaqytynda aıaqtalmaýyna qarjylyq máseleler sebep bolǵan. Kompanııa jumysty jandandyrý úshin jumysshylar sanyn kóbeıtpek. Qazir úıdegi jumystardyń shamamen 10% aıaqtalmaǵan. Negizinen páterlerdiń ishki árleýi men aýmaqty abattandyrý jumystary qalǵan.
Desek te, qurylys kompanııasy úıdiń aıaqtalýyna qatysty naqty merzimdi ataǵan joq.
Buǵan deıin Qazaqstanda 43 myńnan astam kámeletke tolǵan jetim baspana ala almaı otyrǵanyn jazǵan edik.
