Petropavlda 60-80 jastaǵy zeınetkerler marafon júgiredi
Petropavldaǵy «Fenıks» sport klýbynyń eń jasy úlken múshesi – Galına Zımına. Onyń jasy 82-de. Galına Andreevna kóp jyldar boıy kitaphanashy bolyp jumys istedi, qalalyq halyqtyq horda án aıtty, qoǵam ómirine belsene aralasty.
Biraq ýaqyt óte kele densaýlyǵy syr berip, aıaǵynan júre almaıtyn kezderi kóbeıdi.
Osylaısha, ulynyń keńesimen týflıdi yńǵaıly krossovkıge aýystyryp, stadıonda júgirýdi ádetke aınaldyrady.
«1982 jyly gazette belgili sportshy Anatolıı Klevakınniń barlyq tilek bildirýshilerdi densaýlyq úshin júgirýge shaqyrǵan jazbasyn oqydym. Osylaısha sport klýbyna múshe boldym. Bastapqyda salmaq túsirmeı kishkentaı qashyqtyqqa júgirdim, keıin 5-10 shaqyrymdy erkin eńseretin boldym. Densaýlyǵym da jaqsardy. Al bir jyldan keıin Máskeýdegi halyqaralyq marafonǵa qatystym, bul men úshin úlken nátıje edi. Sodan keıin de qanshama marafonǵa qatystym, túrli júldelerim júzge jýyq. Sportqa kelgenime 40 jyl bolypty», - deıdi Galına Zımına.
Klýbtyń taǵy bir múshesi Antonına Shershnevanyń jasy 64-te. Mektepti bitirisimen ol oblys ortalyǵyndaǵy medıtsınalyq ýchılışege, medbıke mamandyǵy boıynsha oqýǵa túsedi.
Alaıda bul salada bir kún de jumys istemegen eken.
«Ol kezde joldama boıynsha jumysqa jiberetin, meni onkologııalyq dıspanserge bóldi. Biraq oqýdy jalǵastyramyn dep sheshtim jáne medıtsınany emes, sportty tańdadym. Osylaısha, Petropavldaǵy joǵary oqý ornyna dene tárbıesi mamandyǵy boıynsha oqýǵa tústim. Eńbek jolymdy oblys ortalyǵyndaǵy mektepterdiń birinde dene shynyqtyrý muǵalimi bolyp bastadym. Keıin turmysqa shyqtym, qyzymdy bosandym. Dekrettik demalystan keıin ózim oqyǵan medıtsınalyq ýchılışege jumysqa ornalasyp, sol jerde 30 jyldan artyq, zeınet demalysyna shyqqanǵa deıin dene shynyqtyrý sabaǵynan berdim», - deıdi Antonına Shershneva.
Sportqa 17 jasynda kelgen boıjetken sodan beri odan qol úzbegen. Ol úshin salamatty ómir salty birinshi orynda.
«Sportqa oıda-joqta keldim. Jarystardyń birinde 400 metrlikke júgirýden birinshi bolyp keldim, osylaısha meni jeńil atletıkadan jattyqtyrýshy Anatolıı Fedoshın baıqap, ózine shaqyrdy. Ol kiside 7 jyl boıy jattyqtym. Osy ýaqytqa deıin qala boıynsha 400, 200, 100 metrge júgirýden meniń rekordym jańarǵan emes. Oblys boıynsha da 400 jáne 100 metrge júgirýden rekord ornatqanmyn, qansha jyl ótse de ony da áli eshkim ózgerte almady. Sońǵy ret 28 tamyzda jartylaı marafonǵa qatysyp, 5 km júgirdim. Óz jasymdaǵylardyń arasynda birinshi kelip, júldeli boldym», - deıdi zeınetker.
Qazir Petropavldaǵy «Fenıks» klýbyna 60-tan astam adam múshe.
Ár jeksenbi saıyn olar saıabaqta jınalyp, júgiredi, keıin bári dastarhan basynda jınalyp, josparlaryn ortaǵa salady, jetistikterimen bólisedi.
«Bastapqyda men barǵan klýb «Atlant» dep ataldy. Ol 1987 jyly qurylǵan edi. On jyl jumys istedi. Keıin «Bodrost» degen klýbqa múshe boldym. Bul klýb 1982 jyldan 2019 jylǵa deıin jumys istedi. Men oǵan 2006 jyly kelip, 17 jyl júgirdim. Al qazirgi «Fenıks» klýby nebary 3 jyl ǵana jumys istep jatyr. Júgiretinder sany azaıǵandyqtan biz «Bodrost» pen «Nadejdany» qosyp, jańa klýb qurdyq.
Biz, jasy úlkender, jarystarda jeńiske jetý úshin emes, óz densaýlyǵymyz úshin júgiremiz. Qazir mysaly meniń aýyrýǵa ýaqytym joq. Aptasyna úsh ret basseınge baryp, júzemin. Jıenimmen birge kúnara velosıped tebemiz. Al keshke bos qol otyrmaı súıikti isimmen aınalysamyn, sýret salyp, shulyq toqımyn», - deıdi Antonına Shershneva.
Kóp jyl boıy bala tárbıesimen aınalysqan qart ustazdyń pikirinshe, jaqsy nátıjege qol jetkizý úshin jeńil atletıkaǵa balany 12-13 jastan berý kerek. Al jalpy júgirý eshqashan da kesh emes.
«Ejelgi Gretsııada bıik jartasta: «ádemi bolǵyń kelse – júgir, kúshti bolǵyń kelse – júgir, aqyldy bolǵyń kelse – júgir» dep oıyp jazylǵan eken. Júgirý – eń qoljetimdi dene shynyqtyrý. Oǵan arnaıy qondyrǵylar nemese arnaıy zal, daıyndyq qajet emes. Bar bolǵany ynta jáne yńǵaıly aıaq kıim kerek. Júgirý barysynda adamnyń barlyq negizgi bulshyqetteri jumys isteıdi, energııa jumsalyp, nátıjesinde artyq salmaq ketedi, sondaı-aq júrek aýrýlarynyń aldyn alady. Aǵzadaǵy zat almasý jaqsarady, júıke júıesiniń jumysyn qalypqa keltiredi. Uıqy túzelip, aýrýshańdyq joıylady, adamnyń ómirge qushtarlyǵy artady. Sondyqtan da zamandastarymdy bizdiń qatarymyzǵa qosylýǵa shaqyramyn», - deıdi «Fenıks» sport klýbynyń múshesi Antonına Shershneva.
