Petropavlda 6 saıabaqtyń qurylysy júrip jatyr

PETROPAVL. QazAqparat – Petropavlda jańa saıabaqtardyń qurylysy júrip jatyr. «Bereke» yqshamaýdanyndaǵy gúl baǵynyń dızaınyn jasaýǵa astanalyq sáýletshi Mustafa Kók tartyldy, dep habarlaıdy QazAqparat tilshisi.

Saıabaqtardyń eń aýqymdysy jańadan salynǵan «Bereke» yqshamaýdanynda boı kóteredi. Aýmaǵy 2,5 ga sozylmaqshy. Buryn qoqys shashylyp, aram shóp ósken aýmaqta qazir qurylys qyzǵan. Batpaqty qurǵatyp, jerdi kóterý úshin ǵana eki aı merzim, 60 myń tonna topyraq ketken. Jospar boıynsha saıabaq gúlge bólenip, tipti amfıteatr da salynbaq.

«Meniń jobam boıynsha saıabaqtaǵy amfıteatrdyń aınalasynda sýburqaqtar bolady. Júgirý jolaqtaryn da umytqanymyz joq. Mundaı saıabaqtar negizinen Eýropada kezdesedi. Sol parktermen teń dárejede jasalynady. Ózindik bir kórkem arhıtektýralyq-estetıkalyq kelbetke ıe bolady. Jalpy, men sáýlet óneriniń osy salasyna kelgenime 5 jyldan asty. Osy aralyqta kóptegen erekshe jobalardy jasadym», - deıdi jobanyń avtory Mustafa Kók.

Astanalyq sáýletshi jobany jasaýǵa eki aıyn sarp etti. Nátıjesinde bul zamanaýı baq turǵyndardyń súıikti demalys ornyna aınalmaq.

«Qurylysqa 25 adam jáne 6 tehnıka jumyldyryldy. Bir-eki kúnniń ishinde elektr symyn tartamyz. Sodan soń kógaldandyrý jumystary qolǵa alynady. Shaǵyn arhıtektýralyq nysandar da qoıylady. Jalpy biz «Bereke» yqshamaýdanynan bólek taǵy eki jerde saıabaq salyp jatyrmyz», - deıdi merdiger kompanııa ókili Asylbek Baǵanov.

«Bereke» yqshamaýdanyndaǵy saıabaq qazan aıynda saltanatty ashylmaq. Jalpy Petropavlda bıyl jańadan osyndaı taǵy 5 demalys orny ashylady dep josparlanǵan.