Petropavlda 5,9 mlrd teńgege jańa jedel járdem stansasy boı kóteredi
ASTANA. KAZINFORM — Prezıdent tapsyrmasyna sáıkes Petropavlda jańa medıtsınalyq jedel járdem stansasyn salýǵa 5,9 mlrd teńge bólindi, dep habarlaıdy Úkimettiń baspasóz qyzmeti.
Soltústik Qazaqstan oblysynyń Petropavl qalasynda jedel jáne shuǵyl medıtsınalyq járdem stansasynyń jańa ǵımaraty salynady. Bul maqsatqa Infraqurylymdy damytý qorynan 5,9 mlrd teńge bólindi. Onyń ishinde medıtsınalyq jabdyqtar satyp alýǵa shamamen 800 mln teńge qarastyrylǵan. Joba Memleket basshysy Qasym-Jomart Toqaevtyń «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýynda bergen óńirlerde densaýlyq saqtaý nysandaryn salý jáne jańǵyrtý jónindegi tapsyrmalaryn oryndaý aıasynda júzege asyrylady.
Qazir oblystyq jedel medıtsınalyq járdem stansasy qaladaǵy 22 brıgadanyń jáne aýyldyq jerlerdegi 14 bólimsheniń jumysyn úılestiredi. Olar 510 myńnan astam turǵynǵa medıtsınalyq qyzmet kórsetedi. Ár brıgada táýligine orta eseppen 16 shaqyrtýǵa shyǵady. Jyl saıynǵy shaqyrtýlar sany 100 myńnan asady.
— Jalpy aýmaǵy 1,5 gektar bolatyn keshenniń quramyna tórt qabatty negizgi ǵımarat, tsıfrlyq dıspetcher qyzmeti, sımýlıatsııalyq ortalyq, 20 sanıtarııalyq avtokólikke arnalǵan jyly garaj, kólik jýý orny men jóndeý sheberhanasy kiredi. Qurylys jumystaryn 2027 jylǵy jeltoqsanda aıaqtaý josparlanǵan. Jańa ǵımaratta arnaıy tehnıkany, medıtsınalyq quraldar men dárilik zattardy da saqtaýǵa arnalǵan úı-jaılar qarastyrylatyn bolady. Stansany «sýyq tizbekti» ustap turýǵa arnalǵan jabdyqtarmen jaraqtandyrýǵa erekshe nazar aýdarylmaq, bul preparattardy saqtaýǵa qajetti temperatýrany qamtamasyz etýge jáne olardyń sapasy men tıimdiligin saqtaýǵa múmkindik beredi, — delingen habarlamada.
Jańa jedel járdem stansasynyń qurylysyn salý shuǵyl shaqyrtýlarǵa barý ýaqytyn qysqartyp, óńir turǵyndaryna medıtsınalyq qyzmet kórsetý jedeldigin arttyra túspek. Zamanaýı tsıfrlyq dıspetcherlik bólme qońyraýlardy óńdeýdi jedeldetýge, olardyń basymdyǵyn dál aıqyndaýǵa jáne medıtsınalyq brıgadalardy jedel baǵyttaýǵa múmkindik beredi. Jańa ǵımaratta qyzmetkerler úshin qolaıly jaǵdaılar, medıtsına qyzmetkerleriniń biliktiligin arttyrý úshin sımýlıatsııalyq ortalyq jáne sanıtarlyq kóliktiń senimdi jumys isteýin qamtamasyz etý úshin jyly garaj qarastyrylǵan.
Qazaqstanda halyqqa medıtsınalyq kómektiń qoljetimdiligi men sapasyn arttyrýǵa baǵyttalǵan densaýlyq saqtaý ınfraqurylymyn damytý jumystary jalǵasýda. Bıyl Qazaqstanda 50-ge jýyq densaýlyq saqtaý nysanyn salýǵa 108 mlrd teńge bólingen. Óńirlerde iri nysandar qarqyndy salynýda, olardyń ishinde Qyzylorda men Óskemendegi 300 tósektik kópsalaly aýrýhanalar, Atyraý oblysyndaǵy emhanalar, sondaı-aq Soltústik Qazaqstan oblysy Beskól aýylyndaǵy jáne Taldyqorǵandaǵy ambýlatorııalyq keshender bar. Óskemen qalasynda zamanaýı Gematologııa ortalyǵy paıdalanýǵa berildi.
Osydan buryn Aqmola oblysynda sý tasqynynyń aldyn alý jobalaryna 5,5 mlrd teńge bólingenin jazǵanbyz.
