Petropavlda 550 myń tekshe metrden astam qar shyǵaryldy
PETROPAVL. KAZINFORM – Petropavlda erigen qar sýy úılerge kirmeýi úshin qaladan qar táýlik boıy shyǵarylyp jatyr.
Petropavl qalasy ákimdiginiń málimetinshe, bul iske merdiger uıymdar men qalalyq kommýnaldyq qyzmetter jumyldyrylyp, eki aýysymda iske kirisken. Osy kúnge deıin qala kóshelerinen 550 myń tekshe metrden astam qar shyǵaryldy.
– Aldaǵy on kúnde qar kúrt erı bastaıdy. Sondyqtan osy ýaqyt aralyǵynda qala kóshelerinen jáne jeke sektorlardan qardy múmkindiginshe tezirek shyǵarý óte mańyzdy. Ásirese, Birlik, Bereke shaǵyn aýdandary jáne Jumysshy kenti qaýipti aýmaqta tur. Bul aýdandarda qar shyǵarý jumystary qarqyndy túrde júrgizilip jatyr, – dedi qala basshysy Serik Muhamedıev.
Osyǵan baılanysty qala basshysy jeke turǵyn úılerdiń ıelerinen aýlalaryńyzdy qardan tazalap, qorshaýdan kóshege shyǵarýdy surady.
– Bul arnaıy tehnıkanyń qardy ońaı tıep alyp ketýine múmkindik beredi. Tek birlesken áreket arqyly ǵana kóktemgi qar erý kezeńinde bolýy múmkin sý basý qaýpin azaıta alamyz, – dedi qala basshysy Serik Muhamedıev.
Aldaǵy 10 kún ishinde qala boıynsha eki iri senbilik uıymdastyrý josparlanyp otyr. Oǵan, Petropavl ákiminiń aıtýynsha, barlyq kólik kompanııalary qatysyp, qardy polıgonǵa shyǵarýǵa kómektesedi.
Buǵan deıin Soltústik Qazaqstan oblysynda sý tasqyny kezeńine belsendi daıyndyq júrip jatqanyn jazǵan edik.