Petropavlda 5,4 shaqyrym jylý jelisi jańartyldy
ASTANA. KAZINFORM — Soltústik Qazaqstan oblysynyń ortalyǵynda tórt jylý magıstraliniń ýchaskesi qaıta jańǵyrtyldy. Nátıjesinde jylý júıesiniń senimdiligin arttyrýǵa jáne jylý shyǵyndaryn azaıtýǵa múmkindik týdy. Bul týraly Energetıka mınıstrligi málim etti.
Petropavlda tórt jylý magıstraliniń ýchaskesin qaıta jańǵyrtý jumystary aıaqtaldy.
Jumystar myna ýchaskelerde júrgizildi:
- TM-2 — ÝN-2-07 jerústi torabynan TK-2-16a jylý kamerasyna deıin Jabaev, Shájimbaev, Novaıa jáne Altynsarın kósheleri boıynda;
- TM-3 — TP-3-12a jylý pýnktinen TP-3-15s jylý pýnktine deıin. Bul ýchaskede qubyr dıametri 2Dý800-den 2Dý700 mm-ge ózgertildi;
- TM-6 — ÝN-6-10-s jerústi torabynan TK-6-14-s jylý kamerasyna deıin Rýjeınıkov kóshesi boıynda;
- TM-8 — TK-8-09 jylý kamerasynan ÝN-8-19b jerústi torabyna deıin.
Júrgizilgen jumystar nátıjesinde Petropavlda jylý jelileriniń jalpy uzyndyǵy 5,4 km bolatyn qubyrlary aýystyryldy. Onyń ishinde 3,9 km jylý jelisi 2025–2027 jyldarǵa arnalǵan «Energetıkalyq jáne kommýnaldyq sektorlardy jańǵyrtý» ulttyq jobasy aıasynda qaıta jańǵyrtyldy.
Atalǵan is-sharalar jylýmen jabdyqtaý júıesiniń senimdiligi men turaqtylyǵyn arttyrýǵa, jylý shyǵyndaryn azaıtýǵa, energııa tıimdiligin jaqsartýǵa jáne qalanyń kommýnaldyq ınfraqurylymyn jańartýǵa baǵyttalǵan.
Energetıka mınıstrliginiń Memlekettik energetıkalyq qadaǵalaý jáne baqylaý komıtetiniń aýmaqtyq departamenti Soltústik Qazaqstan oblysynyń elektr jáne jylýmen jabdyqtaý nysandarynyń 2026–2027 jyldardaǵy jylytý maýsymyna daıyndyǵyna monıtorıng júrgizýdi jalǵastyrady.
