Petropavlda 500 lıtrden asa qoldan jasalǵan alkogol tárkilendi
PETROPAVL. QazAqparat - Petropavlda 500 lıtrden asa qoldan jasalǵan alkogol tárkilendi, dep habarlaıdy QazAqparat.
Petropavlda 5-12 shilde kúnderi ótken «Turmys. Qadaǵalaý. Alkogol» aktsııasy aıasynda polıtseıler 500 lıtrden asa qoldan jasalǵan alkogol tárkiledi. Reıd barysynda oblys ortalyǵynyń jeti turǵynynan quramynda spırti bar suıyqtyq quıylǵan bes lıtrlik 100 ydys alyndy. Barlyq anyqtalǵandar saraptamaǵa jiberildi.
Aımaqtaǵy Polıtsııa departamenti 55 jastaǵy qala turǵynynyń qoımasynan 24 bes lıtrli plastıkalyq bótelkeler anyqtalǵanyn da málimdedi. Petropavldyqta qoldan jasalǵan alkogol bar ekendigi jaıly polıtseıler áleýmettik jeliler arqyly bilgen. Áleýmettik jelige qyraǵy qala turǵyny osy faktini rastaıtyn fotosýret salǵan. Ýchaskelik polıtsııa ınspektorlary ákimshilik materıal jınaqtady, saraptama qorytyndysy shyqqan soń ákimshilik jaýapkershilik kózdeledi. Bul er adam buǵan deıin de osyndaı quqyq buzýshylyq jasaǵany úshin polıtseılerdiń kózine túsken. Sol kezde de ákimshilik materıal jınalǵan. Reıdtik is-sharalar barysynda taǵy bir qalalyqtan 41 plastıkalyq bótelke, ıaǵnı 200 lıtrden asa alkogol tárkilendi.
«Mundaı alkogol qaýipti, sebebi osyndaı qoldan jasalǵan alkogol ishýdiń saldarynan adam ýlanyp, ólimge ákelýi múmkin. Odan bólek, spırttik ishimdik saldary otbasylyq-turmystyq qarym-qatynas salasynda qylmys pen quqyq buzýshylyqqa sebepshi bolyp jatady. Sondyqtan spırttik ónimderdi satý ýchaskelik polıtsııa ınspektorlarynyń baqylaýynda», – dep atap ótti Petropavl qalasy Polıtsııa basqarmasynyń bastyǵy Jandos Muqatov.
