Petropavlda 47 jastaǵy jumysshy qurylys basynda qaza tapty

PETROPAVL. QazAqparat – Petropavlda 47 jastaǵy er adam qurylysta joǵarydan qulap ketip, alǵan jaraqatynan aýrýhanada qaıtys boldy, dep habarlaıdy QazAqparat tilshisi.

Oqys oqıǵa 5 jeltoqsan kúni Petropavldaǵy Chkalov-Ýálıhanov-Músirepov-Nazarbaev kósheleriniń boıynda salynyp jatqan 126 páterli turǵyn úıdiń qurylys alańynda saǵat 15.30 shamasynda bolǵan.

Tas qalaýshy bolyp jumys isteıtin Qalel Madenov joǵarydan qulap ketip, aýyr jaraqat aldy. Zardap shegýshi emdeý mekemesinde 6 jeltoqsan kúni qaıtys boldy.

SQO memlekettik eńbek ınspektsııasy basqarmasy osy oqıǵaǵa qatysty túsinik berdi.

«Qaıtys bolǵan er adam plıta jabyndysynyń ústine túsken. «Qurylys-Servıs-SK» JShS dırektory Eńbek ınspektsııasyna qyzmet kórsetý shartyn qosa bere otyryp, jazataıym oqıǵa týraly habarlama berdi. QR Eńbek Kodeksiniń 186-babyna sáıkes «qyzmetkerlerdiń eńbegine baılanysty jáne eńbekke jaramsyzdyqqa, ne ólimge ákep soqqan densaýlyǵyna zııan keltirý jaǵdaılary tergeledi». Qaıtys bolǵan Madenov pen «Qurylys-Servıs-SK» JShS arasynda azamattyq-quqyqtyq sıpattaǵy shart jasalǵandyqtan, bul quqyqtyq qatynastar QR Azamattyq kodeksimen retteledi. Joǵaryda aıtylǵandardyń negizinde bul jazataıym oqıǵa QR Eńbek kodeksinde kózdelgen arnaıy tergeýge jatpaıdy», - dep jaýap berdi memlekettik eńbek ınspektorlary.

Petropavl qalalyq polıtsııa basqarmasynyń málimetinshe, QR QK 156-babynyń 2-bóligi boıynsha sotqa deıingi materıaldar tergelip jatyr.

Er adamnyń qaıtys bolýyna baılanysty qylmystyq is QR QK 156-babynyń 3-bóligi boıynsha qaıta saralandy.

Qazirgi ýaqytta istiń mán-jaıyn zerdeleýge baǵyttalǵan tergeý júrgizilýde. Onyń nátıjesi boıynsha túpkilikti protsessýaldyq sheshim qabyldanbaq.