Petropavlda 400-ge jýyq jas balýan qatysqan el chempıonaty ótip jatyr
PETROPAVL. KAZINFORM — Petropavlda ótip jatqan qazaq kúresinen Qazaqstan Respýblıkasynyń chempıonaty 23 jasqa deıingi sportshylardy jınaǵan.
Jarysqa elimizdiń 17 oblysynan, sondaı-aq Astana, Almaty jáne Shymkent qalalarynan shamamen 400 sportshy qatysyp jatyr.
Chempıonatta 17 salmaq dárejesi boıynsha júldeler sarapqa salynady. Erler arasynda sportshylar 55, 60, 66, 74, 82, 90, 100 jáne 100 keliden joǵary salmaq dárejelerinde, sondaı-aq «Túıe balýan» absolıýttik sanatynda baq synaıdy. Áıelder arasynda jarystar 48, 52, 56, 60, 65, 70, 75 jáne odan joǵary salmaq dárejeleri boıynsha ótip jatyr.
Soltústik Qazaqstan oblysy dene shynyqtyrý jáne sport basqarmasynyń málimetinshe, chempıonattyń negizgi maqsaty — ulttyq sportymyz qazaq kúresin damytý jáne nasıhattaý, jas sportshylardyń sheberligin arttyrý, halyqaralyq arenaǵa shyǵaratyn elimizdiń eń myqty balýandaryn anyqtaý.
Jarystyń birinshi kúni-aq keı salmaq dárejeleri boıynsha jeńimpazdar anyqtaldy. Máselen qyzdar arasynda 65 kel3 salmaqta shymkenttik Sabına Álibek birinshi oryn aldy. 70 kel3 salmaq dárejesinde Mańǵystaý oblysynyń balýany Uldana Hodjanazarova jeńis tuǵyrynan kórindi. 77 kel3 salmaqta Almaty oblysynyń týmasy Shuǵyla Maqsatqyzyna jeter jan bolmady. Al 77 kel3 joǵary salmaqta Batys Qazaqstan oblysynyń balýany Aısulý Sársenova jeńiske jetti.
Erler arasynda birinshi kúni 90 keli salmaqtaǵy balýandar boz kilemge shyqty. Nátıjesinde shymkenttik Aqyljan Tursynbek chempıon atandy. Aqtóbe oblysynyń balýany Ámirbek Rahımov 100 keli salmaq dárejesinde eshkimge des bermedi. Al Soltústik Qazaqstan oblysynyń balýany Ádilet Myrzash +100 keli salmaq dárijesinde jeńis tuǵyrynan kórindi.
Buǵan deıin Aqmola oblysynda memlekettik qyzmetshiler arasynda respýblıkalyq spartakıadanyń ótkenin jazǵan edik.
