Petropavlda 40 shaqty qylmysqa qatysy bar áıeldiń isi tergelip jatyr
PETROPAVL. QazAqparat – Petropavlda «Alaıaqtyq» baby boıynsha ustalǵan áıeldiń 40-tan astam qylmysqa qatysy bolýy múmkin, jábirlenýshiler qatary kúnnen-kúnge tolyǵyp jatyr, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, byltyr qazan aıynda Petropavl qalalyq polıtsııa basqarmasynyń tergeý bóliminiń qyzmetkerleri QR Qylmystyq kodeksiniń 190-baby «Alaıaqtyq» boıynsha kúdikti 39 jastaǵy qala turǵynyna qatysty tergeýdi bastady. Búgingi kúni onyń 40 qylmysqa qatystylyǵy anyqtaldy, jábirlenýshilerdiń tizimi kúnnen-kúnge tolyǵyp jatyr. Keltirilgen shyǵyn somasy 13 mln teńgeden asady.
Alaıaq «kerek adamdar arqyly joǵarǵy bilim týraly dıplomdardy jedel satyp alýǵa kómektesemin» dep jurttan aqsha alǵan. Budan basqa, áıel óz qurbandaryn qosymsha syıaqyǵa joǵary oqý ornyna túsirip, orta arnaýly bilimi bar stýdentterge arnalǵan baǵdarlama boıynsha qurylǵan «jedeldetip oqytý tobyna» ornalastyramyn dep ýáde etken. Tártip saqshylarynyń sózine qaraǵanda, zardap shekkenderdiń kópshiligi ózderiniń aldanǵandaryn sezse de, aılar boıy jalǵan ýádeniń oryndalatynyn kútken.
«Jábirlenýshilerdiń keıbiri «jaýapkershilikke tartylamyz dep qaýiptenip, polıtsııaǵa júginýge asyqpaıdy. Alaıaq jańa klıentterdi ákelgenderge jeńildik usynylǵan. Eger zardap shekkenderdiń áreketinde qylmystyq pıǵyl bolmasa, olar qylmystyq jazaǵa tartylmaıdy. Biz kúdiktiniń áreketinen zardap shekken barlyq jábirlenýshilerdi polıtsııaǵa habarlasýlaryn suraımyz», - deıdi Petropavl qalalyq polıtsııa basqarmasy bastyǵynyń orynbasary Álnur Ahmedııarov.
