Petropavlda 40 mln teńgege satyp alynǵan avtobýs testileýden ótti
PETROPAVL. QazAqparat - Petropavl avtoparki jańa avtobýstarmen jańalanbaq. Solardyń biri búgin qala kóshelerinde testileýden ótkizildi, dep habarlaıdy QazAqparat tilshisi.
SQO Avtokólik qoǵamynyń málimetinshe, qazirgi tańda Petropavlda jolaýshylardy kúndelikti 270 avtobýs 24 baǵyt boıynsha tasymaldaıdy. Alaıda olardyń basym bóligi eskirgen. Bul máseleni sheshý úshin Petropavl qalasyna 40 avtobýs satyp alynady.
«Maýsym aıynda Pavlov zaýytynan múmkindigi shekteýli jandarǵa qolaıly, pandýs ornatylǵan 4 avtobýs satyp alynady. Qazir «Golden Dragon» kompanııasynyń avtobýsy testileýden ótedi. Kóńilden shyǵyp jatsa - alamyz. Árıne, kóliktiń yńǵaılylyǵy, qala kóshelerinde emin-erkin júrýi úshin uzyndyǵy eskeriledi. Nátıjesinde qanshasyn satyp alynatynymyzdy sheshemiz. Ázirge josparda 40 danasyn alamyz degen oı bar», - deıdi «SQO Avtokólik odaǵy» birlestiginiń tóraǵasy Galına Semenova.
«Golden Dragon» kompanııasynyń avtobýsy «ASTANA MOTORS»zaýytynda qurastyrylǵan. Baǵasy - 40 mln teńge. Uzyndyǵy - 11 metr, otyratyn 32 orny bar. Qysta jyly, al jaz mezgilinde salqyn bolmaq. Aýa baptaǵyshy bar, tegin ınternetpen jáne pandýspen jabdyqtalǵan.
«Bul kompanııanyń úsh túrli avtobýsy bar. Olar uzyndyǵymen ári jabdyqtalýymen erekshelenedi. Bıyldan bastap kólikter Almaty qalasynda da qurastyryla bastaıdy», - deıdi kompanııa ókili Dáýren Esembaev.
Jańa avtobýsty tekserýden ótkizýge óńir basshysy Qumar Aqsaqalov qatysyp, óz baǵasyn berdi.
«Avtobýstyń sapaly ekenin kórdik. Іshi keń, yńǵaıly. Zaýyt ókilderi kóliktiń qysta jyly bolatynyn aıtty. Aqyldasyp, sheshim qabyldaımyz. Jaqyn arada 30-40 avtobýs alýǵa daıynbyz», - dedi Qumar Aqsaqalov.
Jańa kólikter birinshi kezekte halyq kóp júretin ortalyq kóshelerge jiberilmek.
