Petropavlda 4 jasar bala kóp qabatty úıdiń terezesinen qulap ketti

PETROPAVL. KAZINFORM – Petropavlda bes qabatty úıdiń terezesinen qulap ketken 4 jasar búldirshinniń ómiri úshin dárigerler kúresip jatyr.

Oqys oqıǵa 7 maýsym kúni boldy.

«Petropavl qalasy polıtsııa basqarmasynyń «102» jedel nómirine Ibraev kóshesindegi bes qabatty úıdiń terezesinen balanyń qulap ketkendigi týraly aqparat tústi. Qazirgi ýaqytta búldirshin oblys ortalyǵyndaǵy emdeý mekemeleriniń birinde. Tekserý júrgizilip jatyr», - dep habarlady Soltústik Qazaqstan oblysy polıtsııa departamenti baspasóz qyzmetinen.

Oblystyq kópbeıindi balalar aýrýhanasynyń dırektory Nurlan Aımanovtyń aıtýynsha, bala jansaqtaý bóliminde jatyr, jaǵdaıy óte aýyr. Qandaı jaraqattar alǵany dárigerlik qupııa. Mamandar búldirshindi aman alyp qalý úshin qoldan kelgenniń bárin jasap jatyr.

Buǵan deıin úı ishinde qulap, tura almaı qalǵan ájege qutqarýshylar kómekke kelgenin jazǵan edik.