Petropavlda 4 balanyń anasy kópirden sekirmek boldy
Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, qutqarýshy Evgenıı ıAzykov ákesimen birge týǵan jeri Dýbrovnoe aýylyna týystaryna baryp, úıine qaıtyp kele jatty. Petropavlǵa kire beristegi Esil ústindegi kópirde jas áıeldiń kópirdiń jaqtaýynan ustap, tómen qaraı sekirýge oqtalyp turǵanyn baıqap qalady. 7 jyl qyzmetinde kóp nárseni kórip, túrli tótenshe oqıǵalardy bastan ótkergen maman bul jaǵdaıda mınýttar emes, sekýndtardyń sanaýly ekenin birden túsinedi.
«Sosyn bári kınodaǵydaı boldy. Men birden tejegishti bastym, qýanyshqa oraı meniń artymnan eshkim kele jatqan joq edi. Esikti julqa ashyp, qarsy kele jatqan kóliktiń aldynan júgirip ótip, sekirgeli turǵan kelinshekke umtyldym. Ol da qolyn bosatty, men de ustap úlgerdim», - deıdi sol kúngi oqıǵany eske alǵan Evgenıı.
32 jastaǵy K.-ny aman-esen qaýipsiz jerge shyǵarǵan qutqarýshy birden polıtsııany shaqyrdy.
«Kelinshek jylap, sekirýge ne sebep bolǵanyn, ómir súrgisi kelmeıtinin aıtty. 4 balanyń anasy eken. Sol jerdegi kólik júrgizýshileri de kelip qandaı kómek kerek ekenin surady. Polıtsııa patrýli kelgenshe men áıeldi tyńdadym jáne ony múmkindiginshe tynyshtandyrýǵa tyrystym», - deıdi Evgenıı.
