Petropavlda 38 jastaǵy áıel vokzalǵa jarylǵysh zat «qoıdy»
ASTANA. QazAqparat - Petropavlda jalǵan habarlamanyń saldarynan Temirjol vokzalynan 250 adamdy qaýipsiz jerge shyǵarýǵa týra keldi, dep habarlaıdy QazAqparat tilshisi SQO ІІD baspasóz qyzmetine silteme jasap.
«22 sáýir kúni «102» nómirine Temirjol vokzalynda jarylǵysh zattyń qoıylǵany týraly habarlama kelip túsken. Aıtylǵan orynǵa SQO ІІD, Petropavl qalasynyń ІІB qyzmetkerleri, UQK ókilderi, qalalyq prokýratýra qyzmetkerleri men TJD, jedel járdem qyzmetteri kelip jetti. Kúsh qurylymdarynyń qyzmetkerleri vokzaldy qorshap, 250 adamdy qaýipsiz jerge kóshirdi», - delingen habarlamada.
Quzyrly vedomstvonyń habarlaýynsha, júrgizilgen tekserý jumystary vokzalda eshqandaı jarylǵyshtyń, kúdikti zattyń da joǵyn anyqtaǵan.
«Polıtsııa qyzmetkerleri atalǵan oqıǵaǵa baılanysty jalǵan habarlama bergen Petropavl qalasynyń turǵyny - 1980 jylǵy áıeldi ustady. Qazirgi ýaqytta kúdiktige QR QK-niń 273-baby boıynsha (Terrorızm aktisi týraly qasaqana jalǵan habarlama taratý) aıyp taǵylýda», - dep habarlaıdy SQO ІІD baspasóz qyzmetinen.
Eske sala ketsek, bul sońǵy ýaqytta Petropavl qalasynda tirkelgen birinshi jaǵdaı emes. Ótken aptanyń dúısenbisinde ǵana qaladaǵy saýda dúkenderiniń birinde jarylǵysh zattyń baryn aıtyp, jalǵan habarlama taratqan taǵy bir áıel ustalǵan bolatyn.
