Petropavlda 38 kóp qabatty úıdiń shatyryn, 200-den astam lıftini aýystyrý qajet
PETROPAVL. QazAqparat – Petropavlda bıyl kóp qabatty úılerdiń shatyrlary men lıftiler aýystyrylmaq. Bul maqsatqa jergilikti bıýdjetten qarajat bólinedi, dep habarlaıdy QazAqparat tilshisi.
Soltústik Qazaqstan oblysy ákimi baspasóz qyzmetiniń málimetinshe, qazir Petropavlda 1100 kópqabatty turǵyn úı bar. 2011-2020 jyldar aralyǵynda olardyń tek 170-i ǵana kúrdeli jóndeýden ótti. Búginde shatyrdy jóndetýge kezekte 38 kóp qabatty úı tur.
Taǵy bir ózekti másele – lıftilerdiń tozyǵy jetip, isten shyǵýy. Oblys ortalyǵyndaǵy 9 qabatty úılerde 367 lıft bar, onyń 8-i múldem jumys istemeıdi.
Petropavl turǵyny Ivan Aldonın 2-toptaǵy múgedek. Eki jyldan beri tek baldaqpen ǵana júredi. Toǵyzynshy qabatta turatyn oǵan lıftiniń joqtyǵynan túsip-shyǵýy qıyn.
«Men bul úıde 2000 jyldan beri turamyn. Men kelgende lıft istemeı turdy. Dalaǵa shyǵý árıne, qıyn. Kishkentaı balasy bar kórshiler de arbalaryn súırep júrgeni. Mundaı kóp qabatty úılerge lıft kerek-aq», - deıdi Ivan Aldonın.
2011 jyldan bastap Petropavlda 32 lıft aýystyrylǵan. Qazirgi ýaqytta taǵy 217-sin aýystyrý qajet. Paıdalaný merzimi 25 jylǵa shaqtalǵan bul qondyrǵylardyń búginde ábden tozyǵy jetken.
«Oblystyq bıýdjetten shatyrdy jáne lıftini jóndeýge qarjy bólemiz. Biraq ony turǵyndar PIK arqyly qaıtarýlary qajet bolady. Kóktemde jumystardy bastaımyz, bul másele sheshimin tabady», - dedi kóp qabatty úılerdiń turǵyndarymen kezdesken oblys ákimi Qumar Aqsaqalov.
