Petropavlda 37 alaıaqtyq deregine qatysy bar kúdikti ustaldy
PETROPAVL. KAZINFORM – Petropavl turǵyny tehnıkalyq qyzmet kórsetý stantsııasyn basqaryp, klıentteriniń aldyndaǵy mindettemeni oryndamaǵan.
Tergeý málimetterine sáıkes, tehnıkalyq qyzmet kórsetý stantsııasynda másele ótken jyldyń tamyz aıynan bastap týyndaı bastaǵan. Turǵyndar avtokólik qosalqy bólshekteri men jóndeý jumystaryna aqy tólegen. Alaıda olarǵa qyzmet tıisti deńgeıde nemese múlde kórsetilmegen. Keltirilgen zalal somasy kóbine júzdegen myń teńgeni quraǵan, al bir derek boıynsha 1,5 mln teńgeden asqan.
Avtokólik ıeleri uzaq ýaqyt boıy máseleni ózara sheshýge bolady dep eseptep, quqyq qorǵaý organdaryna júginbegen. SQO PD krımınaldyq polıtsııa basqarmasynyń jedel ýákilderi kelip túsken aryzdardy salystyryp, alaıaqtyqtyń júıeli sıpat alǵanyn anyqtap, kúdiktiniń izine túsken. Stantsııa jumysyna is júzinde 26 jastaǵy qala turǵyny basshylyq jasaǵany belgili boldy. Al resmı túrde onyń dırektory basqa adam bolǵan.
Qazirgi ýaqytta kúdikti tergeý ızolıatoryna qamaldy. Birneshe ret jasalǵan alaıaqtyq faktileri boıynsha qozǵalǵan qylmystyq is 37 epızodtan turady. Polıtsııa qyzmetkerleri jábirlenýshilerdi jáne istiń barlyq mán-jaıyn anyqtap jatyr.
Krımınaldyq polıtsııa basqarmasy qyzmetkerleri osyndaı alaıaqtyq shemalardyń qurbany bolmaý úshin turǵyndarǵa qyzmet kórsetý týraly shart jasaýdy, fıskaldyq chekter men qosalqy bólshekterdi qabyldaý-tapsyrý aktilerin talap etýdi usynady. Tólemdi kassa arqyly nemese kompanııanyń resmı esepshotyna jasaǵan jón. Eger shart talaptarynyń oryndalýy sozylyp, qyzmet kórsetýshi baılanysqa shyǵýdan jaltarsa, dereý polıtsııaǵa habarlasý qajet.
Buǵan deıin «SMS-blaster» arqyly 150 myń alaıaqtyq habarlama taratqan top ustalǵanyn jazǵan edik.
