Petropavlda 34 sarbaz «atqysh» mamandyǵyn aldy
PETROPAVL. QazAqparat - Petropavlda QR Qorǵanys mınıstrliginiń áskerı-tehnıkalyq mektebin aıaqtaǵan 34 kýrsant saltanatty túrde ant qabyldady, dep habarlaıdy QazAqparat tilshisi.
Áskerı tehnıkalyq mekteptiń tárbıelenýshileri 40 kún ishinde áskerı-tehnıkalyq mamandyqtardyń birin meńgeredi. Petropavldaǵy Jeńis saıabaǵynda emtıhandardy sátti tapsyrǵan sarbazdar saltanatty túrde ant qabyldady. Oqý kýrsynan ótken túlekter «qatardaǵy jaýynger» atanyp, áskerı bıletpen qatar «atqysh» mamandyǵy boıynsha sertıfıkat almaq.
«Oqýǵa nıet etip kelgenderdiń arasynda zańgerler de, baǵdarlamashylar da, muǵalimder de bar. Olar áskerı polıgonda bolyp, oqý-jattyǵýlardan ótti. Qarý-jaraqpen tanysyp, nysanaǵa tıgizýdi úırendi. Áskerı bılet alǵannan keıin túlekterimiz qyzmet etýge daıyn», - deıdi SQO áskerı-tehnıkalyq mekteptiń oqytýshysy Jaılaý Sháripov.
Áskerı tehnıkalyq mektepke 24 pen 27 jas aralyǵyndaǵy joǵary bilimi bar jigitter túse alady. Oqý aqyly, 263 myń teńge turady.
«Mundaı mektepter tıimdi, 40 kún ishinde áskerı bılet alý jastarǵa ońtaıly bolsa, elimizdiń Qarýly Kúshteri qatary da mobıldi rezervpen tolyǵady. Qazir mundaı mektepter elimizdiń 15 qalasynda bar. SQO-daǵy oqý orny Qostanaı oblysynyń azamattaryn da daıarlyqtan ótkizedi. Oqý aqysy sarbazdardy kúndelikti úsh mezgil tamaqpen, áskerı kıimmen jáne jatatyn orynmen qamtamasyz etýge jumsalady», - deıdi SQO Qorǵanys isteri departamenti baspasóz qyzmetiniń bastyǵy Aıman Ábjapbarova.
Bıyl áskerı-tehnıkalyq mektep 500-den asa azamatty oqytýǵa tapsyrys alǵan. Bul jolǵy túlekterdiń 15-i SQO-dan bolsa, qalǵany Qostanaı óńiriniń jigitteri. Jalpy jyl basynan 200-ge jýyq azamat Petropavldaǵy áskerı mektepti bitirdi.
