Petropavlda 300-ge jýyq nysan ystyq sýsyz qaldy
PETROPAVL. KAZINFORM — Petropavlda jylý jelileri gıdravlıkalyq synaqtan ótti. Eki apta ystyq sýsyz otyrǵan keı nysandar erteńnen bastap jelige qosylady.
Jylý jelilerin josparly tekserý bıyl 28 mamyrdan bastaldy. «Petropavl Jylý Jelileri» JShS mamandary magıstraldyq jáne taratý qubyrlaryn kezeń-kezeńimen tekserip, aldaǵy jylytý maýsymyna daıyndyq jumystaryn júrgizdi.
— Gıdravlıkalyq synaqtar — búkil jylý júıesine júrgiziletin qatań stress-test. Biz qysymdy ádeıi joǵarylatyp, júıedegi álsiz jerlerdi anyqtaımyz. Mundaı aqaýlardy jazda jóndegen áldeqaıda tıimdi, óıtkeni olar qys mezgilinde úlken máselelerge ákelýi múmkin. Anyqtalǵan barlyq kemshilik tolyqtaı joıylady. Qala turǵyndaryna túsinistik tanytyp, sabyrlyq saqtaǵandary úshin alǵys bildiremiz, — dedi «Petropavl Jylý Jelileri» JShS dırektory Vıtalıı Holosha.
Synaq jumystary júrgizilgen kezeńde qala boıynsha ystyq sý berý ýaqytsha toqtatyldy. Jalpy alǵanda, synaq kezeńinde 1607 nysan ystyq sýdan ajyratyldy. Onyń ishinde 984 kópqabatty turǵyn úı, 234 jeke turǵyn úı, 253 zańdy tulǵa jáne 136 áleýmettik nysan, onyń ishinde mektepter, balabaqshalar men medıtsınalyq mekemeler bar.
11 maýsymnan bastap gıdravlıkalyq synaqtan sátti ótken jelilerge qosylǵan nysandardy ystyq sýmen qamtamasyz etý kezeń-kezeńimen qaıta bastalady.
Al tekserý barysynda aqaý anyqtalǵan ýchaskelerde jóndeý jumysy bastalady. Osyǵan baılanysty 287 nysanǵa ystyq sýdy berý taǵy da kesheýildemek.
Kásiporyn málimetinshe, barlyq jumys bekitilgen kestege sáıkes atqarylyp jatyr. Qaýipsizdik máselesine erekshe kóńil bólingen. Synaqtar júrgizilgen kezeńde qyzmetkerler men qala turǵyndary arasynda eshqandaı jazataıym oqıǵa tirkelgen joq.
Buǵan deıin Ekibastuzdyń iri elektr stantsııalary qysqa daıyndalyp jatqanyn jazǵan edik.
