Petropavlda 30 jyldan artyq bos turǵan tarıhı nysan jóndelip jatyr
PETROPAVL. QazAqparat – Soltústik Qazaqstan oblysynda tarıhı-sáýlet nysany bolyp sanalatyn kópes Shamsýtdınovtyń úıi jóndelip jatyr. Kásipker eski ǵımaratty jańǵyrtyp, saýda úıin ashpaq, dep habarlaıdy QazAqparat tilshisi.
SQO ákimi baspasóz qyzmetiniń málimetinshe, óńir basshysy Qumar Aqsaqalov búgin kópes Shamsýtdınovtyń úıinde atqarylyp jatqan jumystardyń barysyn kórdi.
«Biz jergilikti kásipkerlerge bos turǵan ǵımarattardy jónge keltirip, óz isterin ashýǵa múmkindik berip jatyrmyz. Osyndaı jobalardyń biri – Shamsýtdınovtyń saýda úıi. Halyq arasynda «kolızeı» atanyp ketken tarıhı-sáýlet nysany 30 jyldan artyq bos turdy. Endi munda qazir qurylys jumystary qyzǵan. Kásipker tarıhı atyna zaty saı bolatyndaı saýda úıin ashpaq. Munda sýpermarketten bólek keńseler, fıtnes-ortalyq jáne basseın bolady», - deıdi Qumar Aqsaqalov.
SQO tarıhı-mádenı muralardy qorǵaý men qoldaný ortalyǵynyń málimetinshe, kópes Shamsýtdınov ǵımaratty 1915-1916 jyldary saýda úıi retinde salǵyzǵan. Al 1930-1960 jyldary bul úıde kompartııanyń oblystyq komıteti, 1970-1990 jyldary oblystyq aýrýhana ornalasty. Búginde jeke kásipkerdiń ıeliginde.
Eki qabatty ǵımarat qyzyl kirpishten modern stılinde salynǵan. Petropavldyń dál ortasynda tur.
Jalpy Petropavlda 62 tarıhı nysan bolsa, sonyń 42-si jekemenshiktiń qolynda. Úsh ǵımarat bos tur.
