Petropavlda 3 myń oryndyq kórermen zaly bar sport kesheni salynbaq
PETROPAVL. QazAqparat – Soltústik Qazaqstan oblysynda jyl sońyna deıin birneshe sport nysany paıdalanýǵa berilmek. Búginde 3 myń orynǵa shaqtalǵan kórermen zaly bar sport saraıynyń jobalaý-smeta qujattamasyn ázirleý aıaqtalyp keledi, dep habarlaıdy QazAqparat tilshisi.
Soltústik Qazaqstan oblysy ákimdiginiń málimetinshe, óńirde sport ınfraqurylymyn jaqsartý jáne sport alańdaryn kóbeıti maqsatynda dene shynyqtyrý-saýyqtyrý keshenderi salynyp jatyr. Shal aqyn aýdanynyń ortalyǵy Sergeevka kentinde sport kesheni paıdalanýǵa berilse, alty aýdanda qurylysy júrip jatyr. Budan basqa M.Jumabaev aýdanynda jabyq hokkeı korty ashyldy, taǵy úsh aýdanda soyndaı nysannyń qurylysy júrip jatyr. Olardyń basym bóligi bıyl qoldanýǵa berilmek. Jańa sport zaldary zamanaýı qondyrǵylarmen jaraqtandyrǵan, onda túrli jastaǵy toptarǵa úıirmeler ashylady.
Petropavlda da fıtnes ortalyǵy bar sport-saýyqtyrý kesheni salynyp jatyr. Nysan 20 yqsham aýdanda ornalasqan. Ol 130 adamǵa shaqtalǵan.
Al oblys ortalyǵynyń Chkalov kóshesinde júzege asatyn joba - óńirdegi eń iri sport saraıy atanbaq. Qazirgi ýaqytta onyń jobalaý-smeta qujattamasyn ázirleý aıaqtalyp keledi. Ǵımarattyń jalpy aýdany 32,4 myń sharshy metr. Mundaǵy eń iri sport zalyna 3 myń kórermen syıady. Sondaı-aq, aýyr atletsh, semserlesý, bal bıi, boks, sport gımnastıkasy, oıyn, klassıkalyq kúres zaldary, taekvondo, sambo men dzıýdoǵa arnalǵan jeke zaldar, ústel tennısi, batýt, eki trenajer jáne eki fıtnes zaly jumys istemek.
